ვეტერანი ქართველი ფეხბურთელი, შოთა არველაძე საქართველოს ამჟამინდელი ნაკრების ლიდერის, ხვიჩა კვარაცხელიას „ნაპოლიდან“ „პსჟ“-ში გადასვლას სოციალური ქსელით გამოეხმაურა.
„ხვიჩას თამაშის სტილმა და ევროპაში მისმა გაბრწყინებამ, ორ წელზე მეტი ხნის განმავლობაში გვამყოფა აღფრთოვანებაში და მიხარია, რომ ისეთ კლუბში ითამაშებს, სადაც მის სტილსა და უნარებს კიდევ უფრო დიდი გასაქანი ექნება. მნიშვნელოვანია ისიც, რომ ლუის ენრიკე თანამედროვეობის გამორჩეულად ძლიერი სპეციალისტია და მასთან, კვარა კიდევ უფრო სრულყოფილი მოთამაშე გახდება.
იმისდა მიუხედავად, რომ ამ კლუბში ითამაშეს მესიმ, ნეიმარმა, ზლატანმა, რონალდინიომ და ბექჰემმა, ვფიქრობ პსჟ თავის ისტორიაში ყველაზე დიდ და დასამახსოვრებელ ნაბიჯს სწორედ კვარასთან ერთად გადადგამს და დარწმუნებული ვარ ამას მალე ერთად ვნახავთ.
კვარა გილოცავ ამ წარმატებულ ნაბიჯს. ვულოცავ შენს დიდ ოჯახს, და ყველას, ვინც წვლილი შეიტანა ამ ტრანსფერში. ველოდებით გაბრწყინებას! ❤️👊“, – წერს არველაძე.
შეგახსენებთ, კვარამ პარიზულ კლუბთან კონტრაქტი 2029 წლამდე გააფორმა. მისი ანაზღაურება წელიწადში 9 მილიონი, პლუს ორი მილიონი ბუნუსები იქნება.
ხვიჩა „პსჟ“-ში 7-ნომრიანი მაისურით ითამაშებს.