„ნაპოლის“ მთავარმა მწვრთნელმა, ანტონიო კონტემ, DAZN-თან ქართველი შემტევის, ხვიჩა კვარაცხელიას, შესახებ ისაუბრა.
„ერთი რამ მინდა განვმარტო. მგონია, რომ იტალიურად ვლაპარაკობ, მაგრამ, სამწუხაროდ, ჩემი ნათქვამი ყველას კარგად არ ესმის, ან ბოლო პრესკონფერენციაზე ვერ გაიგეს. მაშინ იმედგაცრუებაზე ვილაპარაკე არა იმიტომ, რომ კვარაცხელიამ იმედი გამიცრუა მე ან კლუბს, არამედ ვგულისხმობდი ჩემს პირად იმედგაცრუებას, რადგან ფეხბურთელის გადაწყვეტილებაზე გავლენა ვერ ვიქონიე.
დღეს წავიკითხე რამდენიმე გამოცემის სათაური, რომელიც არ მომეწონა. მწვრთნელს უნდა შეეძლოს მოთამაშის დარწმუნება, რათა კლუბისთვის საუკეთესო გადაწყვეტილებები მიიღოს. ვწუხვარ, რომ ხვიჩაზე ასეთი გავლენა ვერ მოვახდინე. მეგონა, ზაფხულში დარჩენის აუცილებლობაში დავარწმუნე. ალბათ, ზედმეტად თავდაჯერებული ვიყავი.
საწყენია კვარაცხელიას დაკარგვა. ის დიდი მოთამაშე და ძალიან კარგი ბიჭია. ჯერ კიდევ „ნაპოლის“ ფეხბურთელად ითვლება და ეს არ უნდა დავივიწყოთ. თუმცა, წინსვლა ნებისმიერ შემთხვევაში უნდა გავაგრძელოთ და არ უნდა გავჩერდეთ“, – განაცხადა კონტემ.
შეგახსენებთ, რამდენიმე დღის წინ გავრცელდა ინფორმაცია, რომლის მიხედვითაც, ხვიჩა კვარაცხელია ანტონიო კონტესთან მივიდა და გუნდიდან გაშვება მოთხოვა. სწორედ ამ ფაქტს გამოეხმაურა კონტე.
როგორც უკვე ვიცით, კვარა „ნაპოლიდან“ „პსჟ“ – ში გადადის. ქართველ შემტევსა და პარიზულ კლუბს ტრანსფერის დეტალები უკვე შეთანხმებული აქვთ.