ქართული თუ უცხოური მეგა მუსიკალური კონკურსების მონაწილე, მომღერალი თათია კობალაძე ყელის სიმსივნის დიაგნოზით თურქეთში გაემგზავრა. ამის შესახებ სოციალურ ქსელში თავად წერს.
“წავედი სტამბულში, მემორიალის კლინიკაში. თითქოს ძალიან ძლიერი ვარ, მაგრამ შინაგანად მანგრევს ეს ყველაფერი.”
დაახლოებით ორი თვეა, რაც მომღერალს მძიმე დიაგნოზი დაუსვეს. როგორც ის წერს, დაავადების შესახებ, ჯერ კიდევ ყაზახეთის მუსიკალურ კონკურს “ორ ვარსკვლავში” მონაწილეობის დროს შეიტყო.
“თურმე ჩემი ყელი რა დღეში იყო და როგორ არ ვიმჩნევდი! ბოლო ძალებითა და მთელი გულით ვუმღეროდი ყაზახეთს და ჩემს სქართველოს. და არ ვიცოდი, ჩემს ჯანმრთელობაზე რა ამბებს გავიგებდი, რომ ჩამოვიდოდი, მაგრამ მე ხომ შეუჩერებელი ვარ! ჰეი, შენ, ვერაგო და საზიზღარო დაავადებავ! ყოველდღე გიმეორებ, რომ ჩემს დამარცხებას ვერ შეძლებ და ტყუილად მომაკითხე! მე კიდევ ბევრი უნდა ვიმღერო! ევროვიზია და კიდევ ბევრი სცენა მაქვს წინ! მოეშვი კარგ ადამიანებს და უცოდველ ბავშვებს ნუ აწვალებ! შენ მაინც ვერ გაიმარჯვებ ჩვენზე” – წერდა რამდენიმე დღის წინ ფეისბუქზე თათია.
ყაზახეთის კონკურსმა, რომელიც წელს ბაქოში ჩატარდა, თათიას “წლის ყველაზე წარმატებული ქართველი მომღერლის” ტიტული მიანიჭა. ბოლო ათი წლის მანძილზე, ამ კონკურსზე, უცხოელს და მით უფრო – ქართველს, მონაწილეობა არ მიუღია. კობალაძის ვიდეოების ნახვებმა კი მილიონებს მიაღწია. ამიტომაც იყო, რომ კონკურსმა ქართველი მონაწილე ამ ტიტულით დააჯილდოვა.
თათიამ მძიმე სენი ადრეც დაამარცხა; მებრძოლი და მამაცი მომღერალი მასზე გამარჯვებას ამჯერადაც მოახერხებს.