საზღვაო აკადემიის ადმინისტრაციამ თანამშრომლებს ახალი წელი რუსული დროშით მიულოცა, ფაქტის ამსახველი “სქრინი” “აჭარა თაიმსმა” მოიპოვა. საახალწლო მილოცვა აკადემიაში დასაქმებულებს ადამიანური რესურსების მართვის დეპარტამენტის მეილიდან მიუვიდათ.
ფაქტი დაგვიდასტურა საზღვაო აკადემიის რექტორმა, თუმცა მურთაზ დევაძემ აღნიშნა, რომ თანამშრომელს შეცდომა მოუვიდა, რაზეც მკაცრი რეაგირების მოხდენას არ აპირებს.
“უქმე დღეებთან დაკავშირებით გააგზავნა ეიჩარმა მეილი და თან მიაყოლა გუგლიდან აღებული ფოტო. არ დააკვირდა როგორც ჩანს, ბევრმა შეამჩნია და უთხრეს ეს რა გააკეთეო?! მეილი უკვე გამოიწვია, წაშალა. მეცოდება ახლა თვითონაც, მაგრამ რა ვქნა,” – გვითხრა საზღვაო აკადემიის რექტორმა, მურთაზ დევაძემ.
ინფორმაციისთვის: საზღვაო აკადემია მედიასთან ღია ურთიერთობით არ გამოირჩევა. უმაღლესი სასწავლო დაწესებულება პროევროპულ აქციებს არ უერთდება, მათ შორის ადმინისტრაციას არც “ქართული ოცნების” პოლიციის მიერ დაშავებული და დასახიჩრებული მომიტინგეების ფაქტი დაუგმია.