რუსთაველის გამზირზე მიმდინარე საპროტესტო აქციაზე მობილიზებულ სპეცდანიშნულების რაზმებთან სასულიერო პირი მივიდა.
მამაომ შინაგან საქმეთა სამინისტროს თანამშრომლებს მოუწოდა, რომ მშვიდობიანი დემონსტრანტების წინააღმდეგ არაპროპორციული ძალა არ გამოიყენონ.
“გთხოვთ, ნუ შეასრულებთ ისეთ ბრძანებას, რომელიც ხვალ შეიძლება სანანებელი გაგიხდეთ…
ნუ გამოხატავთ ნურავინ აგრესიას, უმორჩილესად გთხოვთ. ქაოსს, აგრესიას, ერთმანეთთან დაპირისპირებას არაფერი კარგი არ მოუტანია. იქ, სათავეში რომ ხალხის დგას, ერთ-ერთს მაინც გაახსენდეს, რომ მამაო ჩვენო მაინც თქვათ. ილოცეთ, ლოცვა გადაარჩენს ქართველ ერს. შვილო, მითხარით, ეკლესიაში რომ შეხვალთ, რას ეუბნებით უფალს? გთხოვთ დასდეთ პატივი უფალს, ქრისტიანობას”, – ამბობს მამაო.
ცნობისთვის, ამ წუთებში რუსთაველის გამზირზე საპროტესტო აქცია იმართება. სპეცდანიშნულების რაზმი განლაგებულია თბილისის საკრებულოს მიმდებარე ტერიტორიაზე.
ადგილზე წყლის ჭავლის რამდენიმე მანქანა და ასევე სახანძრო-სამაშველო სამსახურის 2 მანქანაა დაფიქსირებული. რობოკოპებს თან აქვთ ხელკეტები – არცერთ მათგანს საიდენტიფიკაციო ნიშნები არ აქვთ.