“მთავარი არხის” გენერალური დირექტორი ნიკა გვარამია “ფეისბუქის” პირად გვერდზე ეხმაურება ნიკა მელიას გადაწყვეტილებას საპარლამენტო მანდატის დატოვების თაობაზე.
“არჩევნებში მონაწილეობა ერთადერთი სწორი გადაწყვეტილებაა. მელიას პარლამენტიდან გასვლაც. მოგვწონს თუ არ მოგვწონს ცალკეული დეტალები,
წილი ნაყარია!
რუბიკონი გადალახულია!
ბრძოლა ქვეყნის გადასარჩენად დაიწყო!
უფლება არ გვაქვს, დავაზიანოთ ეს ბრძოლა და გამარჯვებისკენ მიმავალ გზაზე ნებისმიერი შეფერხება შევქმნათ!
p.s. სხვების პარლამენტში დარჩენა, ამ ვითარებაში, პირადად მე არ მიმაჩნია სწორად. თუმცა, არსებითი ახლა ეს ნამდვილად არ არის. ქვეყნის გადარჩენისთვის ბრძოლა დაიწყო და პირად მოსაზრებებზე ვერაფრით ვერ ავაგებ ამ ეგზისტენციალურ გამოწვევაში ჩემს ჩართულობას. ვერ დავაყენებ სამშობლოზე მაღლა! მთავარი ახლა გამარჯვევბაა! ჩემთვის ეს საკითხი დახურულია,” – წერს გვარამია სოციალურ ქსელში.
შეგახსენებთ, რომ დღეს “ერთიანი ნაციონალური მოძრაობის” თავმჯდომარე ნიკა მელიამ საპარლამენტო მანდატი დატოვა. როგორც მან აღნიშნა, ის მთლიანად ადგილობრივ არჩევნებზე იქნება გადართული.
ამასთან, მელიამ განაცხადა, რომ პარტიის სხვა წევრები პარლამენტში ფორმალურად რჩებიან, რათა პროპორციულ საარჩევნო სისტემასთან დაკავშირებული ცვლილებები, მმართველ გუნდს ბოლომდე მიაყვანინონ.
“მე პირადად მთლიანად მივდივარ ოქტომბრის რეფერენდუმის ბრძოლაში და ვტოვებ იქაურობას. მე ვტოვებ საპარლამენტო მანდატს და თხემით-ტერფამდე გადავდივარ ელენესთან ერთად, ქართველ ხალხთან ერთად უმნიშვნელოვანეს რეფერენდუმში მონაწილეობის მისაღებად”,- განაცხადა მელიამ.
გუშინ, “ქართული ოცნებამ” შარლ მიშელის დოკუმენტი ანულირებულად გამოაცხადა. ამით მმართველმა გუნდმა უარი თქვა დოკუმენტში გაწერილ ვალდებულებაზე – არჩევნებში 43%-ის ვერაღების შემთხვევაში, რიგგარეშე არჩევნების დანიშვნაზე. როგორც “ქართული ოცნების“ თავმჯდომარე ირაკლი კობახიძემ აღნიშნა, რიგგარეშე არჩევნების დანიშვნა “მათ კეთილ ნებაზე” იქნება დამოკიდებული.
აღნიშნული გადაწყვეტილების შემდეგ პარლამენტი დატოვა “გირჩი – მეტი თავისუფლების” ლიდერმა, ზურა ჯაფარიძემ. საკანონმდებლო ორგანოს დატოვებასთან დაკავშირებით გადაწყვეტილება მიიღო, დამოუკიდებელმა დეპუტატმა, თამარ კორძაიამაც.
