ჟურნალისტი გურამ როგავა ჟურნალისტებზე ძალადობაზე სრულ პასუხისმგებლობას პრემიერ-მინისტრ ირაკლი ღარიბაშვილს აკისრებს. როგორც როგავა სოციალურ ქსელში წერს, ირაკლი ღარიბაშვილმა ძალადობა წაახალისა.
“ჟურნალისტებზე ღია თავდასხმის უკან დგას ირაკლი ღარიბაშვილი!
თვალი გავუსწოროთ რეალობას! როცა პრემიერ-მინისტრი მთავრობის სხდომაზე საჯაროდ და ურცხვად აცხადებს, რომ უსუსურია, კანონს და კონსტიტუციას ვერ დაიცავს, საკუთარი მოქალაქეების უსაფრთხოებას ვერ უზრუნველყოფს, – ამით პირდაპირ ამბობს, რომ ემორჩილება ბრბოს და სახელმწიფოს ვერ მართავს.
ღარიბაშვილმა მწვანე შუქი აუნთო აგრესიული ჯგუფების ძალადობას. ყველაფერი რაც ახლა ხდება, მისი პასუხისმგებლობაა” – წერს როგავა.
ღირსების მარში დღეს, 5 ივლისს, ვერ შედგა. მარშის არჩატარების გადაწყვეტილება Tbilisi Pride-ის ორგანიზატორებმა მას მერე მიიღეს, რაც ქალაქის ცენტრში ეკლესიის მიერ ორგანიზებულმა ძალადობრივმა ჯგუფებმა ათობით ადამიანზე დაუსჯელად იძალადეს, თავს დაესხნენ არასრულწლოვნებს, დაამტვრიეს ტექნიკა, პარლამენტის შენობის წინ გაშლილი ოპოზიციის კარვები დაშალეს, შეიჭრნენ და დაარბიეს სირცხვილიასა და თბილისი პრაიდის ოფისები.
აგრესორმა ჯგუფებმა და მათ შორის სასულიერო პირებმა რუსთაველის გამზირზე დილიდანვე დაიწყეს მობილიზება, რომლებიც თავიდანვე აგრესიულად გამოირჩეოდნენ.
მათ იერიში ჟურნალისტებსა და ოპერატორებზე მიმართეს. ჯამში 40-ზე მეტი ჟურნალისტი დაშავდა.
მთავრობის მეთაურმა დღეს დილით გამართულ ბრიფინგზე განაცხადა, რომ თბილისი პრაიდი ორგანიზატორების უკან “რადიკალური ოპოზიცია დგას, სააკაშვილის მეთაურობით” და რომ “ასეთი ტიპის აქციები და ღონისძიებები, პირიქით, ხელს უწყობს მათი ნიშნით, ამ უმცირესობების წარმომადგენლების დისკრიმინაციას”.
სახალხო დამცველის ნინო ლომჯარიას შეფასებით, “ისედაც დაძაბული ფონი ირაკლი ღარიბაშვილის განცხადებამ გაამწვავა”.