“მოვუწოდებ საქართველოს ხელისუფლებას, დაიცვან ტელევიზიების ოფისები, რადგან ჩვენ გვაქვს ინფორმაცია, რომ აპირებენ ოფისების დარბევას, ” – ამის შესახებ “მთავარი არხის” გენერალურმა დირექტორმა ნიკა გვარამიამ “მთავარის” ეთერში დღეს განვითარებულ მოვლენებზე საუბრისას განაცხადა.
ამასთან, გვარამია პრემიერ-მინისტრის თანამდებობის დატოვებისკენ მოუწოდებს.
“მე მივიღე გადაწყვეტილება, მიუხედავად უზარმაზარი საჯარო იტერესისა, “მთავარი არხის” ყველა გადამღები ჯგუფი გამოვიხმო და შევწყვიტო ამ სისაძაგლის გაშუქება, პირველ რიგში, ჩემი ჟურნალისტების ჯანმრთელობისა და სიცოცხლისთვის შექმნილი საფრთხის გამო. ჩემს ყველა ჯგუფს მოვუწოდებ, სასწრაფოდ დატოვონ დისლოკაციის ადგილები და საკუთარ ოფისში წამოვიდნენ.
მოვუწოდებ საქართველოს ხელისუფლებას, დაიცვან ტელევიზიების ოფისები, რადგან ჩვენ გვაქვს ინფორმაცია, რომ აპირებენ ოფისების დარბევას, მათ შორის “მთავარი არხის” ოფისის. და კვლავ, გადადგეს ის ხელისუფლება, რომელმაც ეს ვერ მოახერხა. გადადგეს საქართველოს პრემიერ-მინისტრი და ყველა ის ადამიანი, ვინც პასუხისმგებელი იყო ჟურნალისტების უსაფრთხოებაზე, რომლებიც მუშაობდნენ იქ და ასეთი მძიმე შედეგით ვითარდება ყველაფერი,” – განაცხადა გვარამიამ.
„თბილისი პრაიდის“ მოწინააღმდეგეები კვლავ რუსთაველის გამზირზე არიან შეკრებილები. ადგილზე ამ დროისთვის სიმშვიდეა.
აქციის მონაწილეთა ნაწილი შეკრებილია პარლამენტის შენობის წინ, სადაც სრულდება მუსიკალური ნომრები, ნაწილი კი, ქაშუეთის ეკლესიასთან იმყოფება, სადაც პარაკლისი სრულდება.
მარშის მოწინააღმდეგეები ჟურნალისტებს, ოპერატორებსა და მედიის სხვა თანამშრომლებს დილიდან უპირისპირდებიან.