TV- “პირველის” ჟურნალისტზე თავდასხმისა და ძალადობის ფაქტს ჟურნალისტი ვახო სანაია “ფეისბუქის” პირად გვერდზე ეხმაურება:
“ნეტავ, სათავე სად არის ამ ნაძირალების თავხედობის? კარგად ვიცით, სადაც… ამ მეთოდით ნაპარავ ფულს იცავენ, ესაა მათი ერთადერთი საზრუნავი. ამ ქვეყანაში ყველას ფეოდალად მიაჩნია თავი – ქვეყნის, რეგიონის, მუნიციპალიტეტის, სოფლის, უბნის. მსგავს ქცევაზე ვერტიკალური ნებართვა აქვთ, მის ზემოთ ყველა ასე იქცევა და თავადაც ამ მაგალითს იღებენ, ოღონდ ხელებისა და ფეხების ქნევასაც ამატებენ. ხომ ხედავს ეს რეგვენი, როგორ მიმართავენ ჟურნალისტებს მინისტრები, დეპუტატები, მოსამართლეები – ფიქრობს, მოიპარა იმ ხალხმა ფული და ჟურნალისტი რომ შეკითხვას დაუსვამს, უპასუხებს: – “შე ზონდერო”. გრძნობს, რომ უკამეროდ ის მინისტრი თუ დეპუტატი სიამოვნებით გაუტეხდა თავს ან კამერას. აგერ მის სოფელში გადამღები ჯგუფი რომ ჩავიდა, მართლაც ეგრე მოიქცა. რატომ ღიზიანდებიან ? რა აქვთ დასამალი ? ხომ პატიოსნად ცხოვრობენ ?
მოკლედ, ჩვენს თავებზე – პირდაპირი მნიშვნელობით – გადის ეს ბრძოლა, რომელიც ზუსტად ვიცი, როგორც დასრულდება, ოღონდ ამ ბრძოლის შეწყვეტა დაუშვებელია. რა ბრძოლაა ეს – ჩვენი უფლებებისთვის. ამიტომ ნებისმიერმა კანონის წინაშე პასუხი უნდა აგოს, კანონის აღსრულებას კი საზოგადოების რეაქცია სჭირდება, სხვანაირად ყველა კანონი ფურცელზე რჩება ჩვენს ქვეყანაში.
ჩემი მხარდაჭერა ნინო ელიკაშვილს, ოპერატორს და მთელ ტვ -პირველს” , – წერს სანაია
სოციალურ ქსელში.
TV- “პირველის” გადამღებ ჯგუფზე თავდასხმის ფაქტი გუშინ წალკაში მოხდა. სოფელ წინწყაროს გამგებლის ბიძა, რომელიც რაიონში არაფორმალური დაჯგუფების ლიდერად ითვლება, ჟურნალისტ ნინო ელიკაშვილსა და ოპერატორ პაპუნა ხაჩიძეს თავს დაესხა, მიაყენა ფიზიკური და სიტყვიერი შეურაცხყოფა, დაუზიანა აპარატურა.
პოლიციამ საქმეში ბრალდებული დღეს 1967 წელს დაბადებული გ.ა. წალკაში დააკავა.
შინაგან საქმეთა სამინისტროს ინფორმაციით, გამოძიებით დადგინდა, რომ გ.ა. მიმდინარე წლის 30 ივნისს, წალკის მუნიციპალიტეტის სოფელ წინწყაროში, ტელეკომპანია „პირველის“ ჟურნალისტსა და ოპერატორს დაუპირისპირდა, მათ შეურაცხყოფა მიაყენა და პროფესიული საქმიანობის განხორციელებაში უკანონოდ შეუშალა ხელი.
დანაშაული 2 წლამდე ვადით თავისუფლების აღკვეთას ითვალისწინებს.
ძალადობისა და ჟურნალისტისათვის პროფესიულ საქმიანობაში უკანონოდ ხელის შეშლის ფაქტზე გამოძიება საქართველოს სსკ-ის 126-ე და 154-ე მუხლებით მიმდინარეობს“, – ნათქვამია შსს-ს მიერ გავრცელებულ ინფორმაციაში.
