“დაპაუზდა აშშ დაავადებათა კონტროლისა და პრევენციის ცენტრის კვლევითი პროექტები” – პაატა იმნაძე

დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილე, პაატა იმნაძე აცხადებს, რომ დაპაუზდა აშშ დაავადებათა კონტროლისა და პრევენციის ცენტრის (CDC) კვლევითი პროექტები და CDC-ის დაფინანსებულ ტრენინგებში ახალგაზრდა სპეციალისტების მონაწილეობა.

აღნიშნულით იმნაძემ “ინტერპრესნიუსთან” უპასუხა დაავადებათა კონტროლის ეროვნულ ცენტრში რამდენიმე მიმდინარე პროექტის შეჩერებასთან დაკავშირებით დასმულ კითხვას.

როგორც მან აღნიშნა, ლუგარის ცენტრს სახელმწიფო ბიუჯეტი აფინანსებს.

“აშშ CDC-ის კვლევითი პროექტები დაპაუზდა და CDC დაფინანსებულ ტრენინგებში ჩვენი ახალგაზრდა სპეციალისტების მონაწილეობა. სხვა სააგენტოების და კერძო ფონდების პროექტები ჩვეულებრივად გრძელდება. ლუგარის ცენტრს სახელმწიფო ბიუჯეტი აფინანსებს”, – აღნიშნა პაატა იმნაძემ.

ინფორმაციისთვის, ჯანდაცვის სამინისტროს ინფორმაციით, ლუგარის ლაბორატორიის ან დაავადებათა კონტროლის ცენტრის დახურვაზე საუბარი არ არის, კერძოდ, რამდენიმე მიმდინარე პროექტი შეჩერდა, რომლის შინაარსი კვლევითი საქმიანობა და ტრენინგებია. ჯანდაცვის მინისტრის, მიხეილ სარჯველაძის ინფორმაციით, დაავადებათა კონტროლისა და საზოგადოებრივი ჯანმრთელობის ეროვნულ ცენტრს, აშშ-სგან, დაახლოებით, 2 მილიონი ლარის დახმარება შეუწყდება.