ჯანდაცვის სექტორზე მნიშვნელოვნად გაზრდილი ზეწოლა და არსებული ეპიდვითარების კიდევ უფრო გაუარესების მოლოდინი – ეპიდემიოლოგები სახელმწიფოს არსებული რეგულაციების მკაცრი მონიტორინგისკენ მოუწოდებენ.
“ინფიცირებულთა რიცხვი კატასტროფულად იზრდება, სტაციონარული ბლოკიც მთლიანად გადაჭედილია. ამიტომ ყურადღება კიდევ და კიდევ, ვფიქრობ რომ კიდევ გვაქვს გარკვეული შანსი, რომ ეს მდგომარეობა გამოვასწოროთ. ვერიდოთ თავყრილობებს და ღონისძიებების აღნიშვნას, ასეთ მდგომარეობაში შეიძლება არც იყოს საჭირო აღდგომის დღეებში მკაცრი შეზღუდვა,” – აცხადებს მედიცინის აკადემიური დოქტორი მაკა ბულეიშვილი.
ჰოსპიტალური სექტორის მოსალოდნელ გადატვირთვაზე საუბრობს რესპუბლიკური საავადმყოფოს კლინიკური დირექტორი დევი ტაბიძეც.
“არსებული ეპიდემიოლოგიური მდგომარეობა არის საკმარისად მწვავე და შეიძლება ითქვას, რომ რეალურად ვართ მესამე ფაზაში. გაიზარდა რეანიმაციული პაციენტების რაოდენობაც. ამიტომ ეს ყველაფერი აისახება იმაში, რომ დაავადებას აქვს მძიმე ფორმა. რაოდენობის მაქსიმალურად სწრაფი ზრდა მიგვიყვანს იქამდე, რომ ჰოსპიტალურ სექტორს გაუჭირდება,” – განაცხადა დევი ტაბიძემ.
გუშინ კორონავირუსისგან კიდევ 18 ადამიანი გარდაიცვალა – ასეთი მაღალი სიკვდილიანობის მაჩვენებელი დიდი ხანია არ ყოფილა, გამოვლინდა 1000-მდე ახლად დაინფიცირებული. დადებითობის დღიური მაჩვენებელი 4 %-ს აღემატება.