ოკუპირებული გალის რაიონ სოფელ წარჩეში საკუთარ სახლში დაასვენეს, 7 აპრილს მდინარე ენგურში დაღუპული ცოლ-ქმრის ჯონი გვალიას და მაყვალა გამისონიას ცხედრები.
მათი ცხედრები გუშინ, დღის მეორე ნახევარში გადაასვენეს ენგურის ცენტრალური ხიდიდან.
ცოლ-ქმარს სამი შვილი და მოხუცი დედა დარჩათ. აქედან ყველაზე უმცროსი 7 წლის ილია გვალიაა.
„ილია ზუგდიდიდან ელოდებოდა საჩუქრებს, ახლა კი ზის სასოწარკვეთილი მშობლების სასახლესთან. 76 წლის ბებიას არ ატირებს მიცვალებულებს, შენ არ უნდა იტიროო, შენ უნდა მოგვხედოო, თვითონ კი გულამოსკვნილი ტირის“, – ამბობს ილიას ბიცოლა, რომელიც ზუგდიდში ცხოვრობს და გადასვლას ვერ ახერხებს.
ცოლ-ქმარ გვალიებს მშობლიურ სოფელში სამშაბათს დაკრძალავენ.
დაღუპული ჯონი გვალიას ძმა ზუგდიდში ერთოთახიან ბინაში ცხოვრობს. იგი ძმას და რძალს ოკუპირებულ რეგიონში ვერ დაიტირებს და მათ ცხედრებს ენგურის ხიდთან, გადასვენებამდე დაემშვიდობა.
7 აპრილის ტრაგედიას მდინარე ენგურზე 4 ადამიანის სიცოცხლე ემსხვერპლა.