“ჩემი ღირსეული ქვეყანა. მთელი საზოგადოება გეუბნებათ რომ არ გვინდა ეს ბოროტების მომტანი კანონი, გაიხმეთ უკან, შეწყვიტეთ მსჯელობა”– წერს სოციალურ ქსელში ჟურნალისტი ლიკა ზაკაშვილი.
ცნობისთვის, კომიტეტის სხდომაზე „უცხოური გამჭვირვალობის შესახებ“ კანონპროექტის განხილვა დილიდან ხმაურისა და მწვავე დაპირისპირების ფონზე მიმდინარეობდა. საკომიტეტო მოსმენის პარალელურად, მთელი დღის განმავლობაში აქცია მიმდინარეობდა პარლამენტის უკანა შესასვლელთან. ვითარება საღამოს საათებში დაიძაბა, რის გამოც პარლამენტის მიმდებარედ წყლის ჭავლის მანქანა და სპეცრაზმის მობილიზება მოახდინეს.
შსს–ს გამაფრთხილებელ განცხადება ორჯერ გაავრცელა და აქციის მონაწილეებს პოლიციელების კანონიერი მოთხოვნების დამორჩილებისკენ მოუწოდა. ხოლო, იმ შემთხვევაში თუ აქციის მონაწილეები არ დაემორჩილებიან პოლიციელების კანონიერ მოთხოვნას, გასცდებიან გამოხატვის თავისუფლებისა და მშვიდობიანი შეკრების კანონით დადგენილ ნორმებს, სამართალდამცველები წესრიგის დაცვის მიზნით, კანონით გათვალისწინებულ სპეციალურ საშუალებებს გამოიყენებენ.
ცენტრალური კრიმინალური პოლიციის დეპარტამენტის დირექტორის, თეიმურაზ კუპატაძის განცხადებით, რუსთაველის გამზირზე მიმდინარე აქციაზე, ამ დროისთვის ოთხი პირია დაკავებული.
