რუსთაველის გამზირზე მიმდინარე აქციას საქართველოს პრეზიდენტი სოციალურ ქსელში ეხმაურება:
“სამოქალაქო საზოგადოების მასიური მშვიდობიანი დემონსტრაცია თბილისში „რუსული კანონის“ წინააღმდეგ. “სპეცნაზი” წყლისა და გაზის ბალონებით მზად არიან გადავიდნენ მოქმედებაზე, მშვიდობიანი მოქალაქეების წინააღმდეგ, რომლებიც იცავენ თავიანთ ევროპულ მომავალს. დაკავებები გრძელდება. საქართველო არ შეეგუება რუსეთიზაციას” წერს სალომე ზურაბიშვილი.
ხმაურიანი განხილვის შემდეგ, იურიდიულმა კომიტეტმა “რუსულ კანონს” მხარი დაუჭირა. გადაწყვეტილება კომიტეტმა რამდენიმე წუთის წინ მიიღო. კომიტეტის მხრიდან ალტერნატიული საკანონმდებლო პაკეტები უარყოფილი იქნა.
ცნობისთვის, კომიტეტის სხდომაზე „უცხოური გამჭვირვალობის შესახებ“ კანონპროექტის განხილვა დილიდან ხმაურისა და მწვავე დაპირისპირების ფონზე მიმდინარეობდა. „მოქალაქეების“ ლიდერი ალეკო ელისაშვილი საპარლამენტო უმრავლესობის ლიდერ მამუკა მდინარაძეს ფიზიკურად დაუპირისპირდა. ელისაშვილმა მამუკა მდინარაძეს მუშტი დაარტყა, რის შემდეგაც დარბაზში ვითარება უკონტროლო გახდა. ელისაშვილს ოცნების წევრები დაესხნენ თავს და ჯგუფურად, ფიზიკურად გაუსწორდნენ.
გარდა ამისა, კომიტეტის თავმჯდომარე ანრი ოხანაშვილი სხდომიდან აძევებდა ყველას, ვინც კი კანონს რუსულად მოიხსენიებდა.
საკომიტეტო მოსმენის პარალელურად, მთელი დღის განმავლობაში აქცია მიმდინარეობდა პარლამენტის უკანა შესასვლელთან.
შსს–ს გამაფრთხილებელ განცხადება ორჯერ გაავრცელა და აქციის მონაწილეებს პოლიციელების კანონიერი მოთხოვნების დამორჩილებისკენ მოუწოდა. ხოლო, იმ შემთხვევაში თუ აქციის მონაწილეები არ დაემორჩილებიან პოლიციელების კანონიერ მოთხოვნას, გასცდებიან გამოხატვის თავისუფლებისა და მშვიდობიანი შეკრების კანონით დადგენილ ნორმებს, სამართალდამცველები წესრიგის დაცვის მიზნით, კანონით გათვალისწინებულ სპეციალურ საშუალებებს გამოიყენებენ.