ინფექციური პათოლოგიისა და შიდსის ცენტრის გენერალური დირექტორის, თენგიზ ცერცვაძის განცხადებით, სეზონურ ვირუსებთან დაკავშირებით ქვეყანაში განგაშის ან პანიკის არანაირი საფუძველი არ არსებობს.
ამის შესახებ თენგიზ ცერცვაძემ „პალიტრანიუსის“ გადაცემა „თავისუფალ სტუდიაში“ განაცხადა.
„ბოლო კვირების განმავლობაში საქართველოში ნამდვილად ფიქსირდება რესპირაციული ინფექციების შემთხვევების მატება, მაგრამ მინდა დავაფიქსირო მყარი პოზიცია, რომ არანაირი საფუძველი განგაშის ან პანიკისთვის, არ არსებობს. ეს რაოდენობა, რომელიც ახლა, ფიქსირდება ექსტრაორდინარული არ არის, ეს არის ამ პერიოდისთვის, საქართველოსთვის ჩვეული, ყოველწლიური რაოდენობა“, – განაცხადა ცერცვაძემ.
მისი თქმით, COVID19-ის პერიოდში, რესპირაციული ინფექციები პრაქტიკულად გამქრალი იყო, რაც გასაგებია, რადგან მკაცრი შეზღუდვები ხელს უწყობდა რესპირაციული ინფექციების პრევენციას.
თენგიზ ცერცვაძის თქმით, როდესაც აღნიშნული შეზღუდვები მოიხსნა, რესპირაციული ინფექციები ჩვეულ დონეს დაუბრუნდა.
მისი განმარტებით, მოქალაქეების აღქმაა მოსაზრება იმის შესახებ, რომ ახლა მიმდინარე ვირუსი „კოვიდვირუსთან“ შედარებით რთულია.
„ეს არის უბრალოდ, მოქალაქეების აღქმა, დაავიწყდათ ის, რაც იყო წინა სამი წლის განმავლობაში,თორემ სიმძიმე მაშინ უნდა გენახათ, როდესაც მსოფლიოში 7 მილიონი ადამიანი გარდაიცვალა კოვიდით“, -განაცხადა თენგიზ ცერცვაძემ და ასევე აღნიშნა, რომ რესპირაციული ინფექცია მძიმედ მიმდინარეობს, თუმცა მისი შედარებაც კი არ შეიძლება იმასთან, რაც 3 წლის განმავლობაში იყო.
რაც შეეხება ე.წ. ღორის გრიპს, თენგიზ ცერცვაძის განმარტებით, ეს ჩვეულებრივი სეზონური გრიპია.