საქართველოს ნაკრებისა და „ნაპოლის“ ვარსკვლავის, ხვიჩა კვარაცხელიას საფეხბურთო აგენტმა, მამუკა ჯუღელმა, „პირველ არხთან“ ექსკლუზიურ ინტერვიუში განაცხადა: „გგონიათ, ოსიმენი მთელი ცხოვრება ნეაპოლში ითამაშებს? წინასწარ გეტყვით, რომ ზაფხულის სატრანსფერო ფანჯრისას საუდის არაბეთში წავა. ხვიჩას მილიარდი რომ მისცე, საუდის არაბეთში სათამაშოდ არ გადავა. კვარაცხელიას სხვა გემოვნება და ცხოვრებისეული ტვინი აქვს. იგი რეალში, ბაიერნში, ბარსელონაში ან სიტიში გადავა“.
ჯუღელის აღნიშნულ კომენტარს ვიქტორ ოსიმენის აგენტი, რობერტო კალენდა, გამოეხმაურა.
„ყველამ საკუთარ საქმეს მიხედოს და პატივი სცეს სხვის შრომას. სხვა მოთამაშეების მომავალზე საუბარი არაა სწორი. ეს ქმნის პრობლემებს და სამწუხაროდ, არასასიამოვნო პროგნოზებს. ჯუღელის სიტყვები ცუდი, ზედაპირული და მიუღებელია. ეს სიტყვები ვიქტორ ოსიმენს ნაპოლის გულშემატკივრებთან პრობლემებს უქმნის, თანაც ისე, რომ რეალობა არაა. ახლახანს მოვაწერეთ ახალ კონტრაქტს ხელი ნაპოლისთან და ვიქტორის ერთადერთი სურვილი, აფრიკის თასის გარდა, „ნაპოლის“ დახმარებაა“, – აღნიშნა მან.
შეგახსენებთ, მანამდე ჯუღელს თავად ვიქტორ ოსიმენმა უპასუხა.