ეროვნულ-განმათავისუფლებელი მოძრაობის წევრი, გაზეთ „განმათავისუფლებელის“ რედაქტორი, ლეილა ცომაია სოციალურ ქსელში ახალ პოსტს აქვეყნებს.
„ოტენის აფთიაქში, 6 თვიანი რემონტის შემდეგ, დღე-დღეზე, რესტორანი გაიხსნება!
თვალსა და გულს ახარებს, ნამდვილად, ლეონიძის ქ. N8-ში მდებარე განახლებული ოტენის ისტორიული აფთიაქის ხილვა, რომელშიც აღსდგა, ათწლეულების განმავლობაში დაფარული კედლისა და ჭერის მხატვრობაც. განახლდა ავეჯიც, რომელსაც დაუბრუნდა ძველი დიდება და ბზვინვარება. აიყარა ათეული წლების წინ დაგებული მეთლახი და შეიცვალა მუხის მსგავსი ლამინატით. ვიმედოვნებ, რომ დედაქალაქის კულტურული მემკვიდრეობის დაცვა-შენარჩუნებისათვის მუდამ მებრძოლი თბილისის ინტელიგენცია და ოტენის შთამომავლობა, არც დღეს შეხვდება დუმილით მასში რესტორნის გახსნას და არ წაუყრუებს ამ უხერხულ ფაქტს!
ჩემის მხრივ, აფთიაქის ერთ-ერთ მეპატრონეს მე შევთავაზე კომპრომისული ვარიანტი, რომ აფთიაქის ცენტრალურ დარბაზში დატოვოს აფთიაქი, ან უკიდურეს შემთხვევაში, სხვა უფრო კულტურული ღონისძიებების დარბაზად აქციოს (დისკუსიების, პრეს-კონფერენციების – თუნდაც, სამთავრობოსაც, როგორც ფინანსური შემოსავლის წყარო…), ხოლო, მეორე უკანა – თეთრი დარბაზი კი ( შესასვლელით „ბარის“ მხრიდან, რის გახსნასაც ჩვენ ყველამ ერთად, წლების წინ წავუყრუეთ), – რესტორნად , რამეთუ მებატრონე აცხადებს, რომ „აფთიაქი აღარ არის შემოსავლიანი, ამ ქუჩის პატარა მონაკვეთზე უკვე ფუნქციონირებს სამი აფთიაქიო“. და, ასეც არის!
საკითხის დახანება არ ეგების, საკითხი ჩვენგან ოპერატიულ რეაქციას საჭიროებს! ეს კი, განახლებული აფთიაქის, ჩემს მიერ ნაჩქარევად გადაღებული ვიდეოებია, რომელშიც შეპარული ხმადაბლაც ვსაუბრობ, ვინძლო არ დამატოვებინონ დარბაზი მათთვის უსიამოვნო ვიზიტორს!“, – აღნიშნულია პოსტში.