ეწირება თუ არა დედაქალაქის ყველაზე გამწვანებული ზონა შიდა კლანურ დაპირისპირებას? – ოპოზიცია ეჭვობს, რომ იპოდრომის უკან კალაძისა და ღარიბაშვილის ინტერესები დგას, საბოლოოდ, კი ტერიტორია დედაქალაქის მერთან დაახლოებულმა დეველოპერებმა შეიძინეს.
ბიძინა ივანიშვილმა იპოდრომი ბოლო სამ თვეში ორჯერ გაყიდა. მიწის მფლობელები ამჯერად ბიზნესმენები ლევან და სოსო ფხაკაძეები გახდნენ.
ფონდმა “ქართუმ” ტერიტორიის 80 ათასი კვადრატული ყველაზე მწვანე ზონა ფხაკაძეების კომპანია “ცენტრალ პარკ ავენიუს” 85 მილიონ დოლარად გადასცა. დედაქალაქის შუაგული მალე სამშენებლო მოედნად გადაიქცევა. აქ კორპუსების მასშტაბური მშენებლობა უკვე დაანონსებულია.
მკვლევარები კი, რომლებიც ოლიგარქის საეჭვო ტრანზაქციებს დიდი ხანია იკვლევენ, ამბობენ, რომ ბიძინა ივანიშვილი უძრავი ქონების გაქეშებაზეა გადასული, რაც შესაძლოა, მოახლოებულ სანქციებს უკავშირდებოდეს.