ახმეტის მუნიციპალიტეტში ავტოსაგზაო შემთხვევა მსხვერპლით დასრულდა.
მდინარე ალაზნის გადასასვლელ ხიდთან მომხდარი ავარიისას ორი ადამიანი დაიღუპა. გავრცელებული ინფორმაციით, დაღუპულები ერთი ოჯახის წევრები, რძალ-მული არიან.
სავარაუდოდ, გადაჭარბებული სიჩქარით მიმავალი ჯიპის მარკის ავტომანქანა, რომელშიც ექვსი ადამიანი, მათ შორის, სამი არასრულწლოვანი იმყოფებოდა, გადაბრუნდა. 6-დან 12 წლამდე ასაკის ბავშვები კი მძიმედ დაშავდნენ.
სასწრაფო-სამედიცინო დახმარების ჯგუფმა, დაშავებული არასრულწლოვნები თელავის რეფერალურ საავადმყოფოში გადაიყვანა.
ექიმების განმარტებით, მოზარდებს მოტეხილობები და მუცლის დახურული ტრავმები აღენიშნებათ.
ამ წუთებში, შესაბამისი კვლევები მიმდინარეობს.
შემთხვევის ადგილზე საპატრულო პოლიცია და მაშველები იმყოფებიან.