კულტურის, სპორტისა და ახალგაზრდობის სამინისტრო სამწუხარო ინფორმაციას ავრცელებს

კულტურის, სპორტისა და ახალგაზრდობის სამინისტრო სამწუხარო ინფორმაციას ავრცელებს:

“ნუცა თაყაიშვილი – ლევილის ქართული სიმბოლო
ღრმა მწუხარებით გაცნობებთ, რომ გარდაიცვალა ლევილის მამულის მკვიდრი, ყველასათვის საყვარელი და პატივსაცემი ქალბატონი ნუცა თაყაიშვილი-გორდელაძისა.
ნუცა თაყაიშვილი დაიბადა 1930 წელს ლევილში, სადაც ოჯახთან ერთად გაატარა ახალგაზრდობის წლები. 1959 წელს ნუცა თაყაიშვილი დაქორწინდა ორესტი გორდელაძეზე და საცხოვრებლად პარიზში გადავიდა. მიუხედავად ამისა, ის ხშირად სტუმრობდა მამულს და მასზე მზრუნველობაში არაერთი წელიწადი გაატარა. ნუცა თაყაიშვილი სრულყოფილად ფლობდა ქართულ ენას და სიცოცხლის უკანასკნელ წუთამდე გამოირჩეოდა თავისი სამშობლოს – საქართველოს პატივისცემითა და უსაზღვრო სიყვარულით.
საქართველოდან ლევილში ჩასული არაერთი სტუმრისათვის ნუცა თაყაიშვილი სითბოსა და მასპინძლობის ქართულ სიმბოლოდ დარჩება.
2016 წლის 23 სექტემბერს, ხანგრძლივი მოლაპარაკებების შემდეგ ლევილის მამული საქართველოს გადაეცა. მე მქონდა პატივი, საქართველოს სახელმწიფოს სახელით მონაწილეობა მიმეღო ამ მოლაპარაკებებში და სიამოვნებითა და მადლიერებით მინდა აღვნიშნო ნუცა თაყაიშვილის მნიშვნელოვანი როლი პროცესის წარმატებით დაგვირგვინებაში. იგი ამ მოლაპარაკებებში ნოე რამიშვილის ოჯახის ერთი ნაწილის სახელით მონაწილეობდა. ბევრ სხვა გამორჩეულ თვისებას შორის, დღევანდელი საქართველოსა და მისი ხალხისადმი გულწრფელი სიყვარულითა და მოკრძალებით აღსავსე დამოკიდებულება ნუცა თაყაიშვილის ერთ-ერთ მთავარი ღირსება იყო.
პირადად ჩემი და საქართველოს კულტურის, სპორტისა და ახალგაზრდობის სამინისტროს სახელით ვუსამძიმრებ ნუცა თაყაიშვილის ახლობლებს, ნათესავებსა და მეგობრებს შესანიშნავი ქალბატონისა და პირველი რესპუბლიკის წარმომადგენელთა მოღვაწეობის უბადლო მცოდნის დაკარგვას”