სიურეალისტური ლანდშაფტი, ყვითელი და მწვანე ფერის მდუღარე წყლები, შხამიანი ქლორი და გოგირდის აირები – ეს ყველაფერი დანაკილის უდაბნოში ხდება, რომელიც მიუხედავად აღწერისა, ექსტრემის მოყვარულ ტურისტებს მუდმივად იზიდავს.
ეს არის ერთ-ერთი ყველაზე მიტოვებული და ცხელი ადგილი მსოფლიოში. იგი მდებარეობს ეთიოპიის ჩრდილო-აღმოსავლეთ ნაწილში და ტემპერატურა აქ ხშირად აღწევს 70 გრადუსს ცელსიუსით, უმეტესწილად კი, სტაბილურად, 45 გრადუსია. ტენიანობა კი მინიმუმამდეა დასული, რადგან ძალიან იშვიათად წვიმს.
თუმცა ბოლოდროინდელმა ექსპედიციამ რეგიონში, აღმოაჩინა, რომ დანაკილის უდაბნო სავსეა სიცოცხლით.
იგი ერთ-ერთი ყველაზე ნაკლებად შესწავლილი ადგილია მსოფლიოში.
- არის თუ არა ცოცხალი ორგანიზმები მჟავაში?
2016 წლის გაზაფხულზე, მკვლევარებმა საბოლოოდ დაიწყეს ნიმუშების შეგროვება ცხელი წყაროებიდან და აუზებიდან, იმ იმედით, რომ ისინი სიცოცხლეს შეიცავდნენ. მათ ასევე გაზომეს აუზების ტემპერატურა და pH-ბალანსი. 2017 წლის იანვარში ისინი მეტი ნიმუშის შესაგროვებლად დაბრუნდნენ. ამავე წლის მარტში მეცნიერ კავალაცის ლაბორატორიამ და მათმა კოლეგებმა იპოვეს სიცოცხლე დანაკილში, მას შემდეგ, რაც მოახერხეს ბაქტერიების დნმ-ის იზოლირება და ამოღება. მათ აღმოაჩინეს, რომ ბაქტერიები არიან “პოლიექსტრემოფილები“, რაც იმას ნიშნავს, რომ ისინი ერთდროულად ადაპტირებულნი არიან ექსტრემალურ მჟავიანობასთან, მაღალ ტემპერატურასა და მაღალ მარილიანობასთან. ეს არის პირველი აბსოლუტური დადასტურება მიკრობული სიცოცხლის შესახებ დანაკილის მჟავე აუზებში.
ჯერ კიდევ გამოუქვეყნებელ კვლევაში ჯგუფმა აღმოაჩინა ბაქტერიული სიცოცხლის ორი განსხვავებული ფორმა ორ ცალკეულ უბანში: მარილის წყაროებსა და დალოლის კრატერის აუზებში, რომლებიც ხასიათდება ნათელი ფერებით, მჟავიანობით და დუღილის ტემპერატურით.
როგორც ჩანს, მეცნიერთა ეს აღმოჩენა უმნიშვნელოვანესია და დაგვეხმარება იმის გაგებაში, თუ როგორ შეიძლებოდა სხვა პლანეტებზე სიცოცხლე გაჩენილიყო.
წყარო: ambebi.ge
