“ეს მაინც დავაფასოთ!” – ხათუნა ხოფერია ფარცხალაძის შესახებ სებ-ის გადაწყვეტილებაზე

ყოფილი პარლამენტარი ხათუნა ხოფერია სოციალური ქსელით საქართველოს ეროვნული ბანკის მიერ მიღებულ ხმაურიან გადაწყვეტილებას გამოეხმაურა.

„დღეს ეროვნულმა ბანკმა არ დაუშვა უცხო სახელმწიფოს მხრიდან საქართველოს საბანკო საქმიანობაში კანონგარეშე ჩარევისა და კომუნისტური დიქტატურის პრეცედენტი! ხომ ხვდებით, ერთი გაუვიდოდათ და ყველას მიაყოლებდნენ, “ურჩებს”! ეს მაინც დავაფასოთ!“, – წერს ხოფერია.

შეგახსენებთ, საქართველოს ეროვნულმა ბანკმა გაავრცელა ინფორმაცია, რომლის თანახმადაც, სებ-მა საქართველოს მოქალაქეებისთვის გამონაკლისი დაადგინა და სანქციათა რეჟიმების შესრულების წესი შეცვალა.

ბრძანების მიხედვით, საქართველოს მოქალაქეებთან დაკავშირებით სანქციები შედის ძალაში, თუკი მათ წინააღმდეგ გადაწყვეტილებას სასამართლო მიიღებს.

3 დღის წინ აშშ-ს მიერ დასანქცირებულ ყოფილ გენერალურ პროკურორს, ოთარ ფარცხალაძეს სებ-მა ანგარიშები გაუყინა, თუმცა მისი ფსბ-ს აგენტობა ამერიკული მხარის მიერაა დადგენილი და არა ქართული სასამართლოს განაჩენის მიხედვით, ამიტომ ფარცხალაძეს ანგარიშებზე წვდომა აღუდგება.

ამასთან, გუშინ იუსტიციის სამინისტრომ გაავრცელა ინფორმაცია, რომ ფარცხალაძეს საქართველოს მოქალაქეობა შეუწყდება. დოკუმენტი ხელმოსაწერად პრეზიდენტს უკვე გაეგზავნა.

ასევე მედიაში გავრცელდა ცნობა, რომ ფარცხალაძემ თავის სახელზე მქონე უძრავი ქონება შვილს გადაუფორმა.