პარტია „საქართველოსთვის“ წევრმა, ნათია მეზვრიშვილმა, სოციალურ ქსელში თბილისში, დოლიძის ქუჩაზე მომხდარი მკვლელობისათვის დაკავებული პოლიციელის შესახებ პოსტი გამოაქვეყნა.
მისი თქმით, ის პოლიციელი, რომელმაც გუშინ დოლიძეზე ცოლი და სიდედრი მოკლა, 2018 წელს ძალადობაში იყო მხილებული და მაშინდელმა შს მინისტრმა, გიორგი გახარიამ, სამსახურიდან გაათავისუფლა.
„ეს პოლიციელი დოლიძეზე ყოფილი ცოლი და სიდედრი რომ მოკლა, 2018 წელს სამსახურიდან გვყავდა დათხოვილი უფლებამოსილების გადამეტების გამო. მინისტრი პარლამენტში გამოდიოდა მისი მხრიდან სამართალდარღვევის შესახებ რომ გავიგეთ და პირდაპირ პარლამენტიდან მოხსნა. შემდეგ, როგორც ჩანს, აღადგინეს და ტრაგედია დატრიალდა.
საინტერესოა, ასევე, როგორ ამუშავებენ მინისტრის იმ დროს გამოცემულ ბრძანებას, რომლის თანახმად, ოჯახში ძალადობაში მხილებული პოლიციელის მიმართ დაუყოვნებლივ გამოიცემოდა შემაკავებელი ორდერი, ჩამოერთმეოდა სამსახურებრივი იარაღი და ხდებოდა დათხოვნა.
ზოგადად ფემიციდის ფაქტებმა ხომ მოიმატა უმოქმედობის გამო და მართლა არ მეგონა ამ ნაწილშიც 2017 წლამდე პერიოდს თუ დავუბრუნდებოდით, როცა ქალთა მიმართ ძალადობისთვის ძალოვნების დაუსჯელობა ჩვეულებრივი ამბავი იყო“, – წერს მეზვრიშვილი.
