„ლელოს“ წევრი სალომე სამადაშვილი სოციალური ქსელით პრეზიდენტ სალომე ზურაბიშვილის იმპიჩმენტის საკითხს გამოეხმაურა.
„საოცარი კონსპირაციების თეორიები ვითარდება, რატომ იწყებს ოცნება იმპიჩმენტს…
მარტივია-რუსები რასაც ავალებენ, იმას აკეთებენ.
მიზანი იგივეა-შეუძლებელი გახდეს კანდიდატის სტატუსის მინიჭება საქართველოსთვის.
როგორც კი პოზიტიური სიგნალი ისმის, რომ ევროპის პასუხი შეიძლება დადებითი იყოს, ყოველ ჯერზე ახალ ინსტრუქციას იღებენ რუსებისგან, რა გააფუჭონ…ხან რუსული კანონი, ხან იმპიჩმენტი…
ასრულებენ ინსტრუქტაჟს, ეშინიათ, პატრონი არ გაუბრაზდეს და არ გაყაროს.
ვინც ამას ვერ ხვდება, ანალიზის უნარი არა აქვს და კონსპიროლოგიით ანაცვლებს მას“, – წერს ის.
აღნიშნული პოსტის კომენტარებში სამადაშვილს ჟურნალისტი თამარ ჩერგოლეიშვილი დაუპირისპირდა.
„ანუ ორბანი და პრორუსი მეპები მაგიტომ უჭერენ მხარს რომ საქართველომ სტატუსი მიიღოს?
ეგეთ იდიოტობას როცა წერ, ცოტა თავმდაბლად მაინც დაწერე“, – პოლემიკა ჩერგოლეიშვილის ამ კომენტარით დაიწყო.
შეგახსენებთ, სალომე ზურაბიშვილი ევროპაში საქართველოსთვის ევროკავშირის კანდიდატის სტატუსის მინიჭებასთან დაკავშირებით მოლაპარაკაბებზე გაემგზავრა.
„ქართულმა ოცნებამ“ ზურაბიშვილის ეს ნაბიჯი გააკრიტიკა და აღნიშნა, რომ მას აღნიშნულ ვიზიტზე მთავრობისგან თანხმობა არ ჰქონია.
ამასთან, „ხალხის ძალის“ წევრმა, გურამ მაჭარაშვილმა განაცხადა, რომ პრეზიდენტის ვიზიტის მიზანია, რომ საქართველოში იყოს არეულობა, მეორე ფრონტი, მისი განცხადებები კი უცხოური ძალების დღის წესრიგში ზის, რომელთაც საქართველოსთვის კარგი არ სურთ.
დღეს კობახიძემ თქვა, რომ პარტია კონსტიტუციასთან მიმართებითაა ვალდებული, ეს უკანასკნელი კი პრეზიდენტმა დაარღვია, მას უპასუხოდ ვერ დატოვებენ და „ქართული ოცნება“ ზურაბიშვილის იმპიჩმენტის პროცესს დაიწყებს.