პოლიტოლოგი ლევან ლორთქიფანიძე მეცნიერებათა ინსტიტუტისა და სეისმური მონიტორინგის ეროვნული ცენტრის დირექტორის, თეა გოდოლაძის წინააღმდეგ აგორებულ კამპანიას გამოაეხმაურა.
„რა სამარცხვინოა, რომ ღირსებასა და პატიოსნებაზე პრეტენზიის მქონე ადამიანები დაწვრილებით განიხილავენ ერთ-ერთი სეისმოლოგის პირადი ცხოვრების დეტალებს და ამ დეტალების თაობაზე ჭორაობენ, ათას ტყუილ-მართალს ავრცელებენ.
მაპატიეთ, მაგრამ გულისამრევია! ამაზე დიდი სიმდაბლე წარმოუდგენელია!
თუ ქ-ნი გოდოლაძის გაკრიტიკება გნებავთ, დაუპირისპირდით მას პროფესიული არგუმენტებით ან განიხილეთ საზოგადოებასთან კომუნიკაციის მისეული სტრატეგია, აპოკალიფსის მოახლოებით გახარებული ყვავის ჩხავილს რომ ჰგავს. სახლში და ლოგინში შევარდნა უზნეობაა.
ნორმალურ საზოგადოებაში მხოლოდ იმ ადამიანთა პირად ცხოვრებაზე მსჯელობენ, რომლებიც მორალურ ავტორიტეტს წარმოადგენენ, მაგალითს აძლევენ დანარჩენ საზოგადოებას, განსაკუთრებული პასუხისმგებლობა ეკისრებათ და დიდი ძალაუფლება აქვთ (ვთქვათ, აშოტ კურაპალატს არ ეპატიებოდა სასახლეში სიძვის დიაცის მოყვანა; ბილ კლინტონს არ ჰქონდა უფლება ცოლისთვის ეღალატა, სიგარით ეწვალებინა ახალგაზრდა თანაშემწე).
P.S. ისე ყველამ თავის ცოდვებს მიხედოს. ამგვარი კამპანიების უკან ვინც დგანან, მათ ცოდვებს კონკრეტული სახელები და გვარები აქვთ. ეს სახელები და გვარები მთელმა ქალაქმა იცის. ჯერ დირე და მერე ბეწვი…“, – აღნიშნავს ლორთქიფანიძე.
შეგახსენებთ, დღეს “კურიერმა” გაავრცელა ინფორმაცია, რომ დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრის დირექტორი, თეა გოდოლაძე ოჯახის წევრის მიმართ ძალადობაშია ბრალდებული.
აღნიშნული მედიის ცნობით, გოდოლაძეს 2 000-ლარიანი გირაო აქვს შეფარდებული.
თეა გოდოლაძის პასუხს გაეცანით ბმულზე.
