პენსიონერი ცოლ-ქმრის მკვლელობა ბინის გამო – აღსრულების ეროვნული ბიურო ამბობს, რომ ბოლო შეხვედრა მხარეებს შორის გუშინ მოხდა, თუმცა შეთანხმება ვერ შედგა.
საუბარია საბურთალოზე მდებარე 227 კვადრატული მეტრი ფართობის ბინაზე, რომელიც მოკლულმა ნანა ფირანიშვილმა იძულებითი აუქციონის გზით გადაიფორმა, თუმცა სახლიდან ძველი მფლობელების, ძლიერიშვილების გამოსახლეობას ვერ ახერხებდა.
აღსრულება ამბობს, რომ მას შემდეგ რაც შეთანხმება ვერ მოხდა, 12 ნოემბერს დაგეგმილი იყო იძულებითი აღსრულების პროცესის ეტაპი, რათა მომხდარიყო უძრავის ქონების გათავისუფლება კანონიერი მესაკუთრის სასარგებლოდ.
ოთხი წლის განმავლობაში აღსრულების ეროვნული ბიურო მედიაციას უწევდა მხარეებს, რათა შემდგარიყო მათ შორის მორიგება. მოლაპარაკებების გზით გამოსახლების პროცესი რამდენჯერმე გადაიდო. მხარეებთან ბოლო შეხვედრა, გუშინ, 11 ნოემბერს გაიმართა, თუმცა შეთანხმება ვერ შედგა, ამიტომ 12 ნოემბერს დაგეგმილი იყო იძულებითი აღსრულების პროცესის ეტაპი, რათა მომხდარიყო უძრავის ქონების გათავისუფლება კანონიერი მესაკუთრის სასარგებლოდ”, -ამბობენ აღსრულების ეროვნული ბიუროში.
სისხლიანი გარჩევა დიდუბეში გუშინ ღამით მოხდა – ცოლ-ქმარი სროლის შედეგად ადგილზე გარდაიცვალნენ. პენსიონერები მცირე ბიზნესით იყვნენ დაკავებულები, ისინი ავეჯის სახლ “საბაში” ვაჭრობდნენ. სწორედ “საბადან” სახლში ბრუნდებოდნენ, როცა სადარბაზოს ლიფტთან მათ შეაიარაღებული პირი დახვდათ.
ორი პირის მიმართ დამამძიმებელ გარემოებაში ჩადენილი განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარების ფაქტებზე შსს-მ 62 წლის გია ძლიერიშვილი დააკავა.
გამოძიება საქართველოს სისხლის სამართლის კოდექსის 109-ე და 236-ე მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.