ქობულეთში, თბილისი-ბათუმის მაგისტრალზე, ბობოყვათში მცხოვრებმა მოქალაქეებმა აქცია გამართეს. მათი თქმით, მამა-პაპისეული მიწების დაკანონებაზე მთავრობამ მათ უარი უთხრა და მიწა ბიზნესის ხელში აღმოჩნდა, რომელიც ბობოყვათში მრავალსართულიან კორპუსის აშენებას გეგმავს.
აქცია 25 ოქტომბერს გაიმართა.
აქციაზე შეკრებილი მოქალაქეები ბიზნესმენ გიორგი რამიშვილს სთხოვენ ღირსეული საცხოვრისით უზრუნველყოფას. მათი აზრით, ბიზნესმენმა უნდა აიღოს სოციალური პასუხისმგებლობა, წინააღმდეგ შემთხვევაში კი, ამბობენ, რომ მშენებლობას ხელს შეუშლიან.
აქციაზე გამოსული მოქალაქეების თქმით, მათ აქვთ გარკვეული დოკუმენტები, რაც ადასტურებს, რომ მიწის სადავო ნაკვეთი მათ მამა-პაპას ეკუთვნოდა, თუმცა ამ დრომდე მათ არ აქვთ სასამართლო დავა მოგებული.
„ბრძოლას შედეგამდე მივიყვანთ, კარვებს გავშლით, აქვე ვცხოვრობთ,“ – აცხადებენ აქციის მონაწილეები.
ორგანიზაციის „ადამიანის უფლებებისთვის“ ხელმძღვანელი, თამაზ ბაკურიძე ამბობს, რომ აქცია ბათუმში გადმოინაცვლებს, თუ ხალხის მოთხოვნა არ შესრულდა.