დავით ფეიქრიშვილის ადვოკატი საუბრობს იმაზე თუ ვინ მიაყენა დაზიანებები დავით ფეიქრიშვილს.
“ჯანმრთელობის მდგომარეობა არის სავალალო, აღენიშნება ფიზიკური დაზიანებების კვალი, რომელიც მას მიადგა 16 ოქტომბრის შემდეგ. მისი გადმოცემით, ფიზიკური დაზიანებები მიაყენეს ვატო ყიფიანმა, ბეგანიშვილმა, შოთა ყიფიანმა, კაჭარავამ და გოცირიძემ. 16 ოქტომბრის შემდეგ მასზე ხორციელდება ფიზიკური და ფსიქოლოგიური ზეწოლა. ისეთ უკიდურეს მდგომარეობაშია, რომ მიიყენა ფიზიკური დაზიანებები.
ეს სამი პიროვნება იმის გულისთვის არიან დაჭერილები, რომ ძმები ფეიქრიშვილებისგან მიიღონ ინფორმაცია, ითხოვენ მობილურ ტელეფონზე დაყენებულ კოდს. გოგა ფეიქრიშვილსაც აქვს დაზიანება, გუშინ ვენები გადაიჭრა, რადგან ძმის სიცოცხლე გადაერჩინა“.თქვა დავით ფეიქრიშვილის ადვოკატმა.
ძმები ფეიქრიშვილები ჯგუფური ძალადობის ბრალდებით 22 სექტემბერს დააკავეს.
ტყუპი ძმების, გიორგი და დავით ფეიქრიშვილების სახელები წლების განმავლობაში არაერთ გახმაურებულ კრიმინალურ საქმეს უკავშირდებოდა. 2016 წელს გიორგი ფეიქრიშვილი იარაღის უკანონოდ ფლობის ბრალდებით დააკავეს. მისი დაკავება ვაკეში სოსო ჯოხაძის მკვლელობას დაემთხვა, თუმცა ფეიქრიშვილი მკვლელობასთან კავშირს უარყოფდა.
დავით ფეიქრიშვილის სახელი კი ე.წ. „მაზავშიკების“ საქმეში ფიგურირებდა. გამოძიება საქმეს ფეხბურთზე ფსონის შედეგად წარმოშობილ დავას უკავშირებდა.
2023 წელს კი თბილისში, ჭავჭავაძის გამზირზე კრიპტოვალუტის გადამცვლელ ერთ-ერთ ოფისში მომხდარი ყაჩაღობის კადრები გავრცელდა. მედიის ინფორმაციით, ერთ-ერთი პირი, რომელიც კადრებში ჩანს, დავით ფეიქრიშვილი იყო. გავრცელებული ინფორმაციით, კრიპტოვალუტის გადამცვლელი ოფისიდან მაშინ განსაკუთრებით დიდი რაოდენობით ფული წაიღეს.
უფრო ადრე, 2020 წელს კი, ძმები ფეიქრიშვილების შესაძლო ლიკვიდაციის მომზადების საქმეზე 7 ადამიანი დააკავეს. სუს-ის ინფორმაციით, გიორგი და დავით ფეიქრიშვილების ავტომობილის დისტანციური მოწყობილობით აფეთქება იგეგმებოდა