თელავში, კავკასიონისა და ალაზნის ქუჩების დამაკავშირებელი, თელავის ხევზე გადებული ხიდი, 12 ივლისს სტიქიის შედეგად წყალმა წაიღო. ხიდი ამ დრომდე აღდგენილი არ არის – ინფორმაციას “მთავარი ამბები კახეთიდან” ავრცელებს.
როგორც ადგილობრივმა ირინა მამულაშვილმა გამოცემას აცნობა, ბავშვები, რომლებიც ალაზნის გამზირზე მდებარე სკოლაში დადიან, გზის შესამოკლებლად ხიდის ადგილზე დარჩენილ დიდი ზომის წყლის მილზე გადადიან.
მშობელი ამბობს, რომ რამდენიმე დღის წინ, ხევში ორი მოზარდი ჩავარდა.
“ორი ბავშვი ჩავარდა, ბეტონზე დახეთქებულს რა შეიძლება დაემართოს. იმედია, კარგად არიან“- ამბობს ადგილობრივი.
მისივე თქმით, დღეს 11 წლის შვილმაც უთხრა, რომ თანაკლასელთან ერთად სახლში სწორედ ამ გზით დაბრუნდა.
მამულაშვილი შესაბამის უწყებებს მიმართავს და უსაფრთხო დროებითი გადასასვლელის მოწყობას ითხოვს.
“დღეს ჩემი 11 წლის ბიჭი მოვიდა მთლად სველი, კლინიკასთან გადმოსულან კლასელი და თვითონ. კიბე დავინახეთ, ჩავედით ხევში და იქიდან ამოვედითო. ვერც გავიგებდი, ბოტასები რომ არ მენახა სველი და ტალახიანი. ასე მიანებეს თავი.
პატარა საფეხმავალო ხიდი მაინც გაეკეთებინათ დროებით, რომ რამე უბედურება არ მოხდეს“- ამბობს მამულაშვილი.
არსებული ინფორმაციით, მუნიციპალიტეტი თელავის ხევზე ხიდის აღსადგენად, საპროექტო სამუშაოებს აწარმოებს.