“არ დადგა დრო, რომ ეს ცირკი დაასრულო?” – მიხეილ სააკაშვილი სასამართლოდან ბიძინა ივანიშვილს მიმართავს

მიხეილ სააკაშვილმა მორიგ სასამართლო სხდომაზე ბიძინა ივანიშვილს მიმართა და მიმდინარე პროცესებს მისი მხრიდან „სადისტური ლტოლვის დაკმაყოფილება“ და „ცირკი“ უწოდა. სააკაშვილის განცხადებით, საქმე, რომელზეც მას ასამართლებენ, რუსეთის „ეფ-ეს-ბეს“ აგენტის, ოთარ ფარცხალაძის შედგენილია და ნორმალურ ვითარებაში დაუყოვნებლივ უნდა შეწყდეს.

საუბარია 7 ნოემბრის საქმეზე. ამასთან, ცნობილია, რომ დღევანდელ პროცესზე ჩვენება ირაკლი რუხაძემ უნდა მისცეს, რომელიც მიხეილ სააკაშვილმა “კრიმინალად” მოიხსენია.

“მინდა, მივმართო ივანიშვილს, რომელიც ამ პროცესით იკმაყოფილებს ჩემდამი სადისტურ ლტოლვას. ბიძინა, იშოვე ფული, დაიმკვიდრე თავი, როგორც დიქტატორმა მსოფლიოში, შენც გაგიჩნდა შვილიშვილები, გახდი ბაბუა და არ დადგა დრო, რომ ეს ცირკი დაასრულო?

საქმე, რომელზეც მასამართლებთ, შედგენილია “ეფ-ეს-ბეს” აგენტის, ოთარ ფარცხალაძე- რომანოვის მიერ. მხოლოდ ამის გამო, რომ “ეფ-ეს-ბეს” ნომრიანმა აგენტმა მოამზადა (ჩემი საქმე) და ხელი მოაწერა მერე მისმა ხელქვეითმა, ნორმალურ სიტუაციაში ეს საქმე უნდა იყოს შეწყვეტილი, მაგრამ ჩვენ არ ვართ ნორმალურ სიტუაციაში.

აქ მოდის ერთ-ერთი ყველაზე დიდი კრიმინალი საქართველოს უახლეს ისტორიაში – რუხაძე. ეს არის კაცი, რომელიც ჯერ პატარკაციშვილს ეხმარებოდა საქართველოს განადგურებაში და რუსეთისთვის ჩაბარებაში, მერე გადახტა ივანიშვილთან და ახლა აპირებს ჩემს წინააღმდეგ ჩვენების მიცემას,” – თქვა მიხეილ სააკაშვილმა სასამართლო პროცესზე.