გრიგოლ ლილუაშვილის საქმე – დღევანდელ პროცესზე სუს-ის ექს შეფის პირადი დაცვის წევრები დაიკითხებიან.
ლილუაშვილის უფლებადამცველს მოლოდინი აქვს, რომ ორივე მოწმე დაადასტურებს, რომეო მიქაუტაძე რომ არასდროს ყოფილა ლილუაშვილის პირად კაბინეტში, მითუმეტეს, 15-კილოგრამიანი ხელბარგით.
ადვოკატები ასევე გეგმავენ, გამოიკითხოს ლილუაშვილის მეუღლე, რომელიც მათი თქმით, ქონებებთან დაკავშირებით ისაუბრებს.
დღეს ბატონი გირგოლის პირადი დაცვის შემადგენლობის წევრები დაიკითხებიან, რომლებიც დაადასტურებენ იმ რეალობას, რაც იყო. მოლოდინი აქვს დაცვას, რომ ისინი დაადასტურებენ, რომეო მიქაუტაძე რომ არასდროს ყოფილა ლილუაშვილის პირად კაბინეტში, მითუმეტეს, 15-კილოგრამიანი ხელბარგით. მფარველად ასახელებენ გრიგოლ ლილუაშვილს, მართალია, ბრალდების მხარემ ისეთი კომენტარი გააკეთა პროცესზეშემდგომ, რომ თითქოს, გივი ჯიბლაძე რა კავშირშია აღნიშნულ სისხლის სამართლის საქმესთან, ანუ გრიგოლ ლილუაშვილის ბრალთან, თუმცა, ფაქტია, რომ ლილუაშვილის სასამართლოს ხდომაზე თავად ბრალდების მხარის მიერ იქნა წარმოდგენილი ეს მოწმე, მათ შორის ქალბატონი ელისო კილაძის მხრიდან, ისეთი დეტალები იქნა გაჟღერებული, ისეთი ნიუანსები, დამოწმებულიც აქვს დაცვის მხარეს, და წარმოდგენილიიც აქვს ობიექტური მტკიცებულებები.
მეუღლის დაკითხვა მხოლოდ იმ მიზანს ემსახურება, რომ სასამართლოსთვის იყოს თვალნათელი, რომ უძრავი ქონება არ არის შეძენილი, ისეთი ფულადი თანხებით, რაც შესაძლებელია ჰქონდეს ფიქრად და ვარაუდად, ბრალდების მხარეს, – ამბობს ლანა ცერცვაძე.
გრიგოლ ლილუაშვილის საქმეზე სასამართლოს გადაწყვეტილება 23 სექტემბრამდე უნდა გამოცხადდეს.
სუს-ის ყოფილი შეფი გასული წლის 23 დეკემბერს დააკავეს – ყოფილ მაღალჩინოსანს ედავებიან „ფულის გათეთრების“ ოთხ ეპიზოდს:
რას ედავებიან ლილუაშვილს?
ქარის ელექტროსადგურების მშენებლობის ლობირებისთვის თურქ ინვესტორ ჩაღათაი ულქერისგან $1 მლნ-ის აღებას, ეკონომიკისა და მდგრადი განვითარების მინისტრის იმჟამინდელი პირველი მოადგილის, რომეო მიქაუტაძის მეშვეობით;
გაზიფიკაციის ტენდერებში დახმარების სანაცვლოდ, კომპანია „ექსპრესსერვისი 2008-ის“ დამფუძნებელ გიორგი ხაჟალიასგან 1,5 მლნ ლარის აღებას რომეო მიქაუტაძის მეშვეობით;
2021-2023 წლებში დანაშაულებრივი „ქოლცენტრების“ მფარველობას, საიდანაც ბრალდების ინფორმაციით, ლილუაშვილმა მიიღო $1 365 000;
პროკურატურა ამბობს, რომ ლილუაშვილი ქრთამის სანაცვლოდ მფარველობდა თბილისის მერიის საბავშვო ბაგა-ბაღების მართვის სააგენტოს ყოფილ დირექტორს, კახა გვანცელაძეს, რომელიც გამოძიების ინფორმაციით, ბაღების შესყიდვებიდან „ატკატებს“ იღებდა.