„ქართული ოცნების“ გენერალური მდივანი, კახა კალაძე აღნიშნავს, რომ მმართველ გუნდში განიხილავენ და შესაბამის გადაწყვეტილებას მიიღებენ ახალი საინიციატივო ჯგუფის ინიციატივასთან დაკავშირებით, რომელიც ქართული იდენტობის, ეროვნულ ერთობისა და სამოქალაქო მშვიდობის დასაცავად შესაბამისი საკანონმდებლო ჩარჩოს შექმნას ითხოვს.
როგორც კახა კალაძემ აღნიშნა, სიტყვის და გამოხატვის თავისუფლება ქვეყანაში დაცულია, აზრის თავისუფლება არ ნიშნავს შეურაცხყოფის მიყენებას და ბილწსიტყვაობას.
„საინტერესო ინიციატივაა, გუნდში გვექნება აღნიშნულთან დაკავშირებით მსჯელობა, შესაბამის გადაწყვეტილებას გავაჟღერებთ იმის მიხედვით, თუ რა შეთანხმება იქნება მიღწეული.
ზოგადად, სერიოზული გამოწვევაა ის, რასაც ვხედავთ. ყველამ კარგად უნდა გაიგოს, რომ ეს შემთხვევითი არ არის. ყველაფერი გარედან არის თავსმოხვეული, დავალებებია კონკრეტული მიმართულებებით – უნდა მოხდეს შეურაცხყოფის მიყენება.
უამრავი ფაქტი შეგვიძლია მოვიყვანოთ, თუ როგორ იბრძოდნენ ეკლესიის წინააღმდეგ წლების განმავლობაში და დღესაც გრძელდება. ასევე, სარწმუნოების, წარმატებული ადამიანების წინააღმდეგ, საამაყო მამულიშვილების წინააღმდეგ ბრძოლა დღესაც გრძელდება.
ეს ყველაფერი გარედან არის წამოსული. უცხოეთიდან მიღებული დაფინანსებით ხდება, ასეთი ორგანიზაციები დაფუძნება, ძალადობრივი ორგანიზაციების წახალისება და ასე შედეგ. ამ ინიციატივას გავივლით გუნდში, მსჯელობა იქნება და მივიღებთ გადაწყვეტილებას. დასარეგულირებელია ეს ყველაფერი, კანონის ქვეშ უნდა მოექცეს. სიტყვის და გამოხატვის თავისუფლება ქვეყანაში დაცულია, აზრის თავისუფლება არ ნიშნავს შეურაცხყოფის მიყენებას, ბილწსიტყვაობას და ასე შემდეგ“,- აღნიშნა კალაძემ.
ინფორმაციისთვის, საქართველოში ახალი საინიციატივო ჯგუფი დაფუძნდა, რომელიც ქართული იდენტობის, ეროვნულ ერთობისა და სამოქალაქო მშვიდობის დასაცავად შესაბამისი საკანონმდებლო ჩარჩოს შექმნას ითხოვს. საინიციატივო ჯგუფის წევრები არიან მსახიობი გიორგი შანიძე, რეჟისორი გიორგი სიხარულიძე და ბათუმის თეატრის დირექტორი კოტე მჟავია.