თამარ რამიშვილი, რომლის პატიმარი ქმარი ციხეში მასზე განხორციელებულ სექსუალურ ძალადობაზე საუბრობს, რუსთავის მე-6 პენიტენციურ დაწესებულებასთან მიმდინარე აქციიდან ციხეების უფროსს, გიორგი პატარიძეს მიმართავს, რომელმაც გუშინ გიორგი დავითაძის მიერ გავრცელებული განცხადების შემდეგ, ციხის ყველა თანამშრომელს მადლობა გადაუხადა.
“მადლობას რომ უხდიან იმ ბადრაგებს გიორგი კვარაცხელიათი დაწყებული დანარჩენებით დამთავრებული, მინდა მოგმართოთ ბატონო გიორგი პატარიძე, მეც გადაგიხდით მადლობას, თუ თქვენ ზუსტად ასე ჩაგიტარებენ ჩხრეკას, გადაგაწვენენ, 6 კაცი დაგაწვებათ თავზე, იმ მანევრებსაც გააკეთებს, რაც გიორგის გაუკეთეს და კიდევ რაღაცებს დაგარტყამენ ჩუმად, მეც გადავიხდი თქვენს ყველა ბადრაგს უღრმეს მადლობას. ველოდები თქვენგან 4 ნახევრ წუთიან ვიდეოს” – ამბობს თამარ რამიშვილი.
ხმაურით დაიწყო აქცია რუსთავის ყველაზე მკაცრი რეჟიმის ციხესთან – სავარაუდო სექსუალური ძალადობის მსხვერპლი პატიმრის მხარდამჭერები პენიტენციური სამსახურის თანამშრომლებს დაუპირისპირდნენ. ადგილზე ვითარება რამდენიმე წუთის განმავლობაში იყო დაძაბული. ხალხი კითხვებზე პასუხებს ითხოვს, რა მოხდა მეექვე დაწესებულებაში და ამ დრომდე რატომ არ უშვებენ სამსახურიდან უმძიმეს დანაშაულში მხილებულ ბადრაგებს.
გიორგი დავითაძის მხარდასაჭერად რუსთავის ციხესთან მივიდნენ უფლებადამცველები და პროევროპულ აქციაზე დაკავებული პატიმრების მშობლებიც.
პატიმრის ოჯახის წევრები და ადგილზე შეკრებილები ციხის უფროსის, შოთა ტრაპაიძის გადადგომას და მიუკერძოებელი გამოძიების ჩატარებას ითხოვენ.
რა მოხდა რუსთავის ციხეში:
პატიმარ გიორგი დავითაძის ბრალდების შემდეგ, რომლის მიხედვითაც ის ბადრაგმა გააუპატიურა, პენიტენციური სამსახურმა 2025 წლის 21 დეკემბერს დეესკალაციის ოთახში გადაღებული 4 წუთიანი ვიდეომასალა გაავრცელა.
კადრებში ჩანს ფიზიკური დაპირისპირება ბადრაგსა და პატიმარ დავითაძეს შორის. პაატა სალიას უწყება ირწმუნება, რომ პატიმარი ტყუის, როცა სექსუალურ ძალადობაზე საუბრობს.
შეგახსნებეთ, რომ პატიმარი ბადრაგს გაუპატიურებაში ადანაშაულებს – შოკისმომგვრელი ჩვენება 36 წლის კაცმა სააპელაციო სასამართლოს დარბაზში მისცა. მეექვსე პენიტენცირი დაწესებულების ბინადარი, გიორგი დავითაძე მოსამართლეს უმტკიცებდა, რომ ციხის სამარტოო საკანში, შურისძიების, დამცირების და ღირსების შელახვის მოტივით, მასზე სექსუალურად იძალადეს.
პატიმრის თანახმად, უმძიმეს დანაშაულს 10-მდე თანამონაწილე ჰყავს – ისინიც ციხის ბადრაგები არიან. კაცის თქმით, არცერთი ბადრაგი ამ დრომდე პასუხისგებააში არ არის მიცემული.
იხილეთ ვიდეო