სუს-ის ყოფილი შეფი დღევანდელ სასამართლო სხდომას არ დასწრებია. მისი უფლებადამცველის განმარტებით, მან ჯანმრთელობის მდგომარეობის გამო გამოცხადება ვერ მოახერხა.
ლანა ცერცვაძის თქმით, არაა გამორიცხული გრიგოლ ლილუაშვილი ხვალინდელ პროცესზე დისტანციურად ჩაერთოს.
რაც შეეხება მოწმე თორნიკე ჯანელიძეს, რომელიც თავადაც არის ამ ეპიზოდში ბრალდებული და ფარცხალაძის მფარველობაში მყოფი “ქოლცენტრებში“ მუშაობას ედავებიან, დაახლოებით სამი საათის განმავლობაში აძლევდა ჩვენებას. ლილუაშვილის უფლებადამცველის თქმით, მან თავის თავზე ისაუბრა და ლილუაშვილი და სუს-ი არ უხსენებია.
თავის ნაწილში, რა როლურ მდგომარეობაში იყო ქოლცენტრთან მიმართებაში ამაზე საუბრობდა. მისი მფარველი სუს-ი არ ყოფილა და შესაბამისად, სახელმწიფო უსაფრთოების სამსახურზე და მითუმეტეს გრიგოლ ლილუაშვილზე დასახელებული მოწმე ვერც ისაუბრებდა.
დღევანდელ პროცესზე, ბატონმა გრიგოლმა, ჯანმრთელობის მდგომარეობის გამო, დასწრება ვერ მოახერხა, თუმცა, ხვალინდელი პროცესისთვის ვუზრუნველვყოფთ ის ჩაერთოს მიმდინარე საქმის განხილვაში. არ გამოვრიცხაქვ არც ფიზიკური მოსვლით და არც დისატანციურად – განაცხადა ცერცვაძემ.
ლილუაშვილი პროკურატურამ გასული წლის დეკემბერში დააკავა. მას ბრალი ედება სისხლის სამართლის კოდექსის 338-ე მუხლის მე-2 ნაწილის ,,გ’’ ქვეპუნქტით და მე-3 ნაწილის ,,ე’’ ქვეპუნქტით, რაც წინასწარი შეთანხმებით ჯგუფის მიერ, განსაკუთრებით დიდი ოდენობით ქრთამის აღებას გულისხმობს და სასჯელის სახით 11-დან 15 წლამდე თავისუფლების აღკვეთას ითვალისწინებს.
რაც შეეხება საბავშვო ბაგა-ბაღების მართვის სააგენტოს ყოფილ დირექტორს კახაბერ გვანცელაძეს, მას „ატკატების“ აღებისთვის ბრალი გასული წლის დეკემბერში წარუდგინეს. პროკურატურის განცხადებით, გვანცელაძეს დიდი ოდენობით თანხის აღებაში ლილუაშვილი მფარველობდა და ამ სქემაში სააგენტოს ყოფილ ხელმძღვანელს სხვა თანამშრომლებიც ჰყავდა ჩართული.