ვულოცავ ქალბატონ სალომე ზურაბიშვილს ამ დამსახურებულ ჯილდოს – ის მართლაც სწორედ მონიშნეს, როგორც უცხო ინტერესების გამტარებელი საქართველოში, – ამის შესახებ შალვა პაპუაშვილმა ჟურნალისტებთან განაცხადა, რითაც გამოეხმაურა ინფორმაციას, რომ Freedom House-ი საქართველოს მე-5 პრეზიდენტს, სალომე ზურაბიშვილს მარკ პალმერის ჯილდოს გადასცემს.
მისივე თქმით, მარკ პალმერის ცნობილია როგორც “ფერადი რევოლუციის” იდეოლოგი და სალომე ზურაბიშვილმა ეს ჯილდო დაიმსახურა.
“ვულოცავ ქალბატონ სალომე ზურაბიშვილს ამ დამსახურებულ ჯილდოს. მან ნამდვილად დაიმსახურა მარკ პალმერის ჯილდო. პალმერი გახლდათ ამერიკის შეერთებული შტატების დიპლომატი, რომელიც “ფერადი რევოლუციების” და სხვა ქვეყნების შიდა საქმეებში ჩარევის იდეოლოგი გახლავთ. სწორედ ის იყო, ვინც თავდაპირველად ამ იდეოლოგიის დამკვიდრება დაიწყო მისი დიპლომატიური კარიერის შედეგად, რომ ამერიკა უნდა ჩარეულიყო სხვა ქვეყნების შიდა საქმეებში, მოეხდინა ინტერვენცია, ამიტომ ის არის ცნობილი, როგორც “ფერადი რევოლუციის” იდეოლოგი. ასე რომ, ვულოცავ ქალბატონ სალომეს ამ დამსახურებულ ჯილდოს. ის მართლაც სწორედ მონიშნეს, როგორც უცხო ინტერესების გამტარებელი საქართველოში. დამსახურებულია, რომ უცხო ძალების ინტერესების გამტარებელი საქართველოში იღებს უცხო ძალების ინტერესების გამტარებლის იდეოლოგის სახელობის ჯილდოს.
მე ვეცნობი ქართველი ხალხის შეფასებას ჩვენ კანონმდებლობასთან დაკავშირებით, ასევე ქართული ეკლესიის შეფასებას ჩვენს ზოგიერთ კანონთან დაკავშირებით. სულ ცოტა ხნის წინ საქართველოს კათოლიკოს -პატრიარქის და საქართველოს ეკლესიის პოზიცია ვნახეთ ოჯახური ღირებულებების კანონთან დაკავშირებით, რომ არათუ ეს კანონები უნდა შეიცვალოს და გაუქმდეს, არამედ, პირიქით, უნდა გაფართოვდეს და განმტკიცდეს. როდესაც ჩვენ გვაქვს არჩევანი, დავუჯეროთ ბრიუსელს თუ საქართველოს ეკლესიას, ჩვენ ვირჩევთ საქართველოს ეკლესიას. შეიძლება ეს ბრიუსელს სწყინს, მაგრამ ცივი წყალი დალიოს, ვისაც ეს სწყინს,” – განაცხადა პაპუაშვილმა.
ცნობისთვის, Freedom House-ი საქართველოს მე-5 პრეზიდენტს, სალომე ზურაბიშვილს დემოკრატიისა და ადამიანის უფლებების დაცვის სფეროში განსაკუთრებული წვლილისთვის მარკ პალმერის ჯილდოს გადასცემს.
„ორგანიზაციის განმარტებით, ეს ჯილდო ბოლო წლებში სალომე ზურაბიშვილის განსაკუთრებული როლის ხაზგასმაა
საქართველოს ევროპული კურსისა და დემოკრატიული განვითარების დაცვის საკითხში. ასევე, პრეზიდენტ ზურაბიშვილისათვის 2026 წლის მარკ პალმერის პრემიის გადაცემა, მისი პრინციპული ლიდერობისა და დემოკრატიული ღირებულებებისადმი მტკიცე ერთგულების აღიარებაა”, – აღნიშნულია ზურაბიშვილის პრესსამსახურის მიერ გავრცელებულ ინფორმაციაში.