გზების დეპარტამენტში შეიქმნება სამსახური, რომელიც გზაზე პირუტყვის გადასვლის შემთხვევების პრევენციასაც უზრუნველყოფს – ინფორმაციას BMG მთავრობის განკარგულებაზე დაყრდნობით ავრცელებს.
გამოცემა წერს, რომ საავტომობილო გზების დეპარტამენტის სისტემაში ახალი სამსახური იქმნება, რომელიც უწყების მართვაში არსებულ გზებზე ნარჩენების მართვის სფეროში ადმინისტრაციულ სამართალდარღვევებს გამოავლენს. ცვლილებები მთავრობის ინიციატივით „ნარჩენების მართვის კოდექსში“ შედის.
ახალი სამსახური უზრუნველყოფს საავტომობილო გზების დანაგვიანებისა და ნარჩენების არასწორი მართვის ფაქტებზე სწრაფ და ეფექტიან რეაგირებას. დღემდე, სხვადასხვა უწყებებს შორის კომპეტენციის განუსაზღვრელობის გამო, მსგავს დარღვევებზე დროული რეაგირება პრობლემას წარმოადგენდა.
კანონპროექტის განხილვისას “ევროპელი სოციალისტების” წევრმა, დეპუტატმა ილია ინჯიამ ინფრასტრუქტურის მინისტრის მოადგილეს ჰკითხა, იქნება თუ არა სამსახურის მოვალეობა საქონლის გზებზე დგომის და გადარეკვის პრევენცია, რომელიც მაგისტრალებზე ხშირად გვხვდება. გიორგობიანმა უპასუხა, რომ ესეც მათი მოვალეობა იქნება.
“რეალურად უნდა გავმიჯნოთ ორ ნაწილად. ერთი არის შპს, რომელიც უზრუნველყოფს გზების მოვლა-შენახვას და მეორე იქნება პრევენციის სახით, რომელიც უზრუნველყოფს, მათ შორის, დაბინძურების და ისევე უსაფრთხოების ნაწილს. ანუ, ამისათვის შეიქმნება უშუალოდ გზების დეპარტამენტში სამსახური, რომელიც უზრუნველყოფს, მათ შორის, ასეთი ტიპის [პირუტყვის გზაზე გადასვლის] ღონისძიებების პრევენციას”, – განაცხადა ინფრასტრუქტურის მინისტრის მოადგილემ მზია გიორგობიანმა.