მიუსაფარი ცხოველების დაცვის მოთხოვნით, ფილარმონიის მიმდებარე ტერიტორიაზე აქცია მიმდინარეობს. შეკრებილი მოქალაქეები ირაკლი კობახიძის 412-ე განკარგულებაში შეტანილი ჩანაწერის გაუქმებასა და ცხოველთა დაცვის მიმართულებით საკანონმდებლო ცვლილებების განხორციელებას ითხოვენ. ინფორმაციას “ტვ პირველი” ავრცელებს.
აქციის მონაწილეები სურსათის ეროვნულ სააგენტოსა და თბილისის მერიის ცხოველთა მონიტორინგის სამსახურს მიუსაფარი ძაღლების გადაყვანასა და მათი დაღუპვის ფაქტებთან აკავშირებენ. მათი განცხადებით, არსებული რეგულაციები გადახედვას საჭიროებს და ცხოველთა დაცვის მექანიზმები უნდა გაძლიერდეს.
“ბოლო თვეებში ძალიან ბევრი ჩვენი მიკედლებული, გადარჩენილი ცუგები არიან გამქრალი, რომლებსაც ვეძებთ. ყველანი არიან გასტერილებულები, ასევე აცრილები, მოვლილები და მგონი, 10 წელია ვუვლით ამ ცუგებს და უცბად ერთ დღეს ყველანი გაქრნენ. ვეძებთ ამ ჩვენ გადარჩენილ და გაზრდილ ცუგებს ყველგან, მაგრამ არსად ჩანან. ვფიქრობთ, რომ ისინი არიან უკვე დახოცილები. გვინდა, რომ შევაჩეროთ ეს ცხოველების კვლა” – ამბობს მოქალაქე.