ჯაშუშობის ბრალდებით დაკავებული გულბაათ რცხილაძე თავს უდანაშაულოდ მიიჩნევს და მის წინააღმდეგ წარდგენილ ბრალდებებს კატეგორიულად უარყოფს. ამის შესახებ მისი ადვოკატი აცხადებს. უფლებადამცველის თქმით, რცხილაძე საკუთარ საქმიანობას საქართველო-რუსეთის ურთიერთობების ნორმალიზების მცდელობად აფასებს და დაკავების მიზეზებთან დაკავშირებით თავადაც გაოგნებულია.
“კატეგორიულად უარყოფს. ეს ადამიანი ამბობს, რომ არანაირი ჯაშუში მე არ ვარ და პირიქით, ჩემი მოღვაწეობა, თუ რამე იყო, იყო მიმართული იქითკენ, რომ რუსეთსა და საქართველოს შორის ურთიერთობის ნორმალიზება მომხდარიყოო. რუსოფობიის მონიტორინგის საბჭოს შექმნას ვუკავშირებ, იმიტომ, რომ ალბათ ამის გამო მოხდა ჩემი დაკავებაო. ობიექტივზე თავისი გადაცემა რომ მიჰყავდა და უფრო გააქტიურებული იყო, ალბათ გარკვეული თანამდებობის პირების გაღიზიანება მოჰყვა ამას. არ ვიცი ვიც ინტერესში შედიოდა ბატონი გულბაათის დაკავება. ყოველ შემთხვევაში, ფაქტია, რომ ბატონი გულბაათი არის უდანაშაულო, თავს მიიჩნევს უდანაშაულოდ. თვითონაც გაოგნებულია, ვერ ხვდება რატომ შეიძლება ყოფილიყო მისი დაავება გადაწყვეტილი.
ირანში აპირებდა წასვლას, კი, მაგრამ ოჯახური მდგომარეობიდან გამომდინარე ბოლო მომენტშ გადაიფიქრა” – ამბობს ადვოკატი.
ჯაშუშობის ბრალდების გულბაათ რცხილაძე სუს-მა გუშინ დააკავა. მას ბრალი უკვე წარედგინა. სუს-ი ამბობს, რომ დაკავებული ორი ქვეყნის სპეცსამსახურებს სისტემურად აწვდიდა მათ სადაზვერვო ხასიათის ინფორმაციას. რცხილაძეს 8-დან 12 წლამდე პატიმრობა ემუქრება.