ეს არის ბიძინა ივანიშვილის მიერ მიღებული გადაწყვეტილება, ეს არის არნახული პოლიტიკური ანგარიშსწორება, – ასე შეაფასა „ნაციონალური მოძრაობის“ ერთ-ერთმა ლიდერმა, ლაშა ფარულავამ ლევან ხაბეიშვილის მიმართ სასამართლოს მიერ გამოტანილი გადაწყვეტილება.
მისივე თქმით, ლევან ხაბეიშვილს 2 წელი და 6 თვე „ბიძინა ივანიშვილმა გამოუწერა“.
„ეს არის ბიძინა ივანიშვილის მიერ მიღებული გადაწყვეტილება. 2 წელი და 6 თვე ივანიშვილმა გამოუწერა ლევან ხაბეიშვილს. ეს არის არნახული პოლიტიკური ანგარიშსწორება. ჯერ აწამეს, ახლა მწამებლების, გდდ-ის წევრების, თანამშრომლების ჩვენებით 2 წლითა და 6 თვით გაუშვეს ციხეში. ეს არის პოლიტიკური ცინიზმი და პოლიტიკური ანგარიშსწორება. ივანიშვილმა მხოლოდ და მხოლოდ ეს გზა აირჩია ოპოზიციასთან, ოპონენტებთან საურთიერთოდ და, რა თქმა უნდა, ეს არის სისუსტის ნიშანი. ეს არ არის სიძლიერის ნიშანი. ვინც ებრძოდა კორუფციას, იმას უშვებენ კორუფციული „ქეისით“ ციხეში. ცინიზმია და პოლიტიკური ანგარიშსწორება.
ახლა ერთიანობის ძალა თუ სადმე უნდა არსებობდეს, ეს არის ქართული ეკლესია, ახალი პატრიარქი. მას აქვს ძალა და ნდობა ჩვენი მხრიდან დაიწყოს პროცესი, რომელიც ჩვენს ერს შეარიგებს, გადატვირთავს და კი, პოლიტიკური პატიმრები უნდა გათავისუფლდნენ და კი, საგარეო საკითხებთან დაკავშირებით ჩვენი ქვეყანა უნდა იყოს ერთიანი! მაგრამ როგორც ჩანს, ივანიშვილმა აირჩია ანგარიშსწორების გზა, ვენდეტისა და ტერორის გზა, რაც საბოლოოდ ქვეყანაზეც აისახა. ამ ქვეყანაში არავინაა ბედნიერი, მხოლოდ და მხოლოდ, ივანიშვილის ერთი ჯგუფია ბედნიერი, რომელიც ძარცვავს ქართველ ხალხს და ღრმავდება კორუფცია და სიღარიბე“,- განაცხადა ლაშა ფარულავამ.
ცნობისთვის, „ერთიანი ნაციონალური მოძრაობის“ პოლიტსაბჭოს თავმჯდომარე, ლევან ხაბეიშვილი და ყოფილი გენერალური პროკურორი, მურთაზ ზოდელავა სასამართლომ დამნაშავედ ცნო. ლევან ხაბეიშვილს სასჯელად 2 წლით და 6 თვით თავისუფლების აღკვეთა განესაზღვრა, ხოლო მურთაზ ზოდელავას – 9 თვით.