16 მაისს, 11:00 საათზე სასახლის ღობის საქმეზე პროკურატურა დასკვნით სიტყვას იტყვის. 7-თვიანი განხილვის შემდეგ ბრალდების მხარემ უნდა თქვას, რის საფუძველზე ითხოვენ აქციის მონაწილეების ციხეში გაშვებას.
უფლებადამცველები ამბობენ, რომ განხილვა ისე დასრულდა, საქმეში ამ დრომდე რჩება უამრავი პასუხგაუცემელი კითხვა.
მათი თქმით, ამდენი ხნის განმავლობაში, ბრალდების მხარემ ვერ წარმოადგინა შესაბამისი ვიდეომტკიცებულებები, რომელიც საკმარისი იქნებოდა გამამტყუნებელი განაჩენის გამოსატანად.
“ბრალდების მხარემ ვეღარ შეძლო იმ ტვირთვის ზიდვა, რასაც ჰქვია უტყუარი მტკიცებულებების წარდგენა სასამართლოში, რომელიც საკმარისი იქნებოდა გამამტყუნებელი განაჩენის გამოსატანად. ტუღუშთან მიმართებაში, ბრალდების მხარემ ვერნაიარი ვიდეომტკიცებულება ვერ წარმოადგინა, გარდა ერთი ვიდეომასალისა, რომელშიც ტუღუში უბრალოს დგას. კითხვა არსებობს კამერებთან მიამრთებაში, ასევე, რატომ არ არის პრეზიდენტის სასახლის ვიდეოჩანაწერები. როდესაც არსებობდა კითხვები, რომ ვიღაცას ეს ღობე გადაჭრილი ჰქონდა, რატომ უთხრეს ზოგიერთ ადვოკატებს უარი ამ ვიდეომტკიცებულებების წარმოდგენაზე”- ამბობს ჯემალ ჭკადუა.
ლაშა ტყეშელაძის თქმით, მტკიცებულებების გამოკვლევის შემდეგ, სასამართლომ ნათლად დაინახა, რომ ამ ადამიანებს დანაშაულია რ ჩაუდენიათ.
“მტკიცებულებები გამოვიკვლიეთ სრულად, სასამართლომაც დაინახა, რომ ამ ადამიანებს დანაშაული არ ჩაუდენიათ. დასკვნით სიტყვაში, პირდაპირ შემიძლია გითხრათ, რომ ამ ადამიანებს ხელში არ ეჭირათ არაფერი, იყვნენ შიშველი ხელებით, იყვნენ კონსტიტუციის ფარგლებში და არ ჩაუდენით არავითარი დანაშაული და ეს ყველაფერი ამ სასამართლოზე დადასტურდა. არყოფილა ობიექტური მოწმე, არ ყოფილა კადრები, მხოლოდ 3-5 წამიანი კადრები” – განაცხადა ტყეშელაძემ.
ბრალდების მხარე დარწმუნებულია, რომ სასამართლო აუცილებლად გამამტყუნებელ განაჩენს გამოიტანს.
“სასამართლოს ერთიან სურათს მივაწვდით ორგანიზებულ ჯგუფურ ძალადობაში მონაწილეობის და სტრატეგიული ობიექტის ხელში ჩაგდების მცდელობის ფაქტებზე. ბრალდების მხარის დასკვნითის შემდეგ, დარმუნებული ვარ, სასამართლო შეაფასებს წარმოდგენილ მტკიცებულებებს და განაჩენი აუცილებლად იქნება გამამტყუნებელი. გამოყოფილ სისხლის სამართლის საქმეზე მიმდინარეობს გამოძიება და ლოგიკურია, შედეგებზე ამ ეტაპზე, საჯაროდ არ ვისაუბრებთ, რომ არ დაზიანდეს გამოძიების ინტერესი” – აცხადებს პროკურორი თამარ იაკობიძე.
შემდეგ პროცესზე, 16 მაისს, არ არის გამორიცხული საბოლოო სიტყვით ისარგებლონ ბრალდებულებმა.