“ეს გოგო, თამარ კოხოძე, რომელიც არის ორსულად, მთელი მარშის და აქციის განმავლობაში ასე ტიროდა, დასტიროდა შვილის ბედს, რომელსაც დიუშენი აქვს და რომლისთვისაც ჩვენი ქვეყანა არ იმეტებს წამალს” – ლია ტაბატაძე

საქართველოს დაუნის სინდრომის ასოციაციის დამფუძნებელი და გამგეობის თავმჯდომარე ლია ტაბატაძე სოციალურ ქსელში პოსტს აქვეყნებს:

“ეს გოგო, თამარ კოხოძე, რომელიც არის ორსულად, მთელი მარშის და აქციის განმავლობაში ასე ტიროდა, დასტიროდა შვილის ბედს, რომელსაც დიუშენი აქვს და რომლისთვისაც ჩვენი ქვეყანა არ იმეტებს წამალს და მკურნალობას.
თამარი ქმართან ერთად ახლაც კანცელარიასთანაა და ღამეს ათენებს.
ცნობისთვის, ოჯახი ქუთაისიდანაა, იქიდან ჩამოდიან ღამის გასათენებლად და მერე მიდიან ხოლმე.
კი, დღეს, დასტრესილი, ნანერვიულები და ნამტირალევი ორსული დედა ღამეს ათენებს წვიმაში და სიცივეში, ჩვენ კი გვძინავს ღრმა ძილით მთელ ერს…
ესაა ჩვენი ქართველობა და ურთიერთ მხარდაჭერა?
ბავშვების სიცოცხლეც კი არ გვადარდებს? ორსული ქალის ქუჩაში, სიცივეში და წვიმაში დგომაც სხვისი ჭირია?
“როსღა გვეღირსოს ჩვენ გაღვიძება?!.” – წერს ლია ტაბატაძე.

წამლების მოთხოვნით დიუშენის სინდრომის მქონე ბავშვების მშობლები კანცელარიასთან უწყვეტ აქციას თითქმის 2 კვირაა მართავენ. 3 მაისს წამლის შემოტანის მოთხოვნით მოქალაქეებმა მსვლელობა გამართეს.