ავსტრიაში პოლიციამ დააკავა 39 წლის მამაკაცი, რომელიც მაღაზიებში ბავშვთა საკვების ქილებში ვირთხის საწამლავს ამატებდა. ინფორმაციას Deutsche Welle ავრცელებს.
გამოძიების მიხედვით, ბრალდებული ზალცბურგის რეგიონში, მარტო მოქმედებდა. მან შანტაჟი მოუწყო გერმანულ კომპანიას HiPP-ს 2 მილიონი ევროს მოთხოვნით. თანხის მიუღებლობის შემდეგ, პროდუქციაში საწამლავის დამატება დაიწყო და ქილებს კვლავ მაღაზიის თაროებზე აბრუნებდა.
დაბინძურებული ქილები აღმოაჩინეს ავსტრიაში, ჩეხეთსა და სლოვაკეთში — სულ ხუთი ერთეული. კიდევ ერთი ქილა ამ დრომდე დაკარგულად ითვლება. შემთხვევის შედეგად დაშავებულები არ დაფიქსირებულა.
სამართალდამცველებმა ეჭვმიტანილი სათვალთვალო კამერების ჩანაწერებისა და მუქარის შემცველი ელექტრონული წერილის დახმარებით დაადგინეს.