ფხაზეთიდან დევნილ აზა ჩილაჩავას პირბადის ტარებისთვის შსს-მ სასამართლოში პროცესი ჩაუნიშნა. ჩილაჩავას 15-დღემდე პატიმრობა ემუქრება.
თბილისის საქალაქო სასამართლოს ვებგვერდზე გამოქვეყნებული ინფორმაციით, საქმეს მოსამართლე თორნიკე ქოჩქიანი დღეს 12 საათზე განიხილავს.
აზა ჩილაჩავამ გამოცემა ნეტგაზეთს უთხრა, რომ ის ამჟამად სასამართლოში არ იმყოფება, რადგან არ იცოდა, რომ პროცესი ჰქონდა. მისივე თქმით, წერილი კურიერმა მიუტანა, თუმცა გაცნობა ვერ მოახერხა.
შეგახსენებთ, რომ გაგრიდან დევნილი აზა ჩილაჩავა რუსთაველის აქციების მუდმივი მონაწილეა. 19 ოქტომბრის საღამოს კრიმინალური პოლიციის ათობით თანამშრომელმა ის თავისუფლების მეტროსთან გააჩერა, სამედიცინო პირბადე ჩამოართვა და ოქმი შეუდგინა.