გასკდა გული, აღარ დაგვრჩა ადგილი, სადაც არ დავჭრილვართ. აწი მართლა გეშინოდეთ ჩვენი, – ასე ეხმიანება პროევროპულ აქციებზე დააკავებული რეზი კიკნაძე, პატიმარ ონისე ცხადაძის მამის გარდაცვალებას.
„სისტემამ მოკლა ონისეს მამა, სრულიად ჯანმრთელი ადამიანი. ნერვიულობისგან საკუთარი სახლის ჭიშკართან დაარტყა და ჩაიკეცა. არ მყავდა ნანახი, მაგრამ ონისე იმდენ რამეს გვიყვებოდა, უნახავად ვიცნობდით. ტიპური იმერელი, უთბილესი, უსაყვარლესი, უმაღლესი იუმორის მქონე, შვილებზე გიჟურად შეყვარებული ადამიანი. მარტო მამაშვილური კი არა, ძმაკაცური ურთიერთობა რომ ჰქონდათ. დედასთან ყოველი დარეკვისას მაშინვე რომ წაართმევდა ხოლმე ტელეფონს და იქიდან ამხნევებდა შვილს, როგორც შეეძლო. ვერ წარმოიდგენთ, როგორი დარტყმა იყო. იმ დღეს ჩვენც მოვკვდით, გავტყდით, ერთი ვაი-ვიში გვქონდა, მაგრამ გათენდა მეორე დღე და ახლიდან გავცოცხლდით…. წარმოიდგინეთ, რას გიზამთ ყველას, ვისაც წვლილი მიგიძღვით ამაში.
ჩვენ თუ გვკლავთ, მოგვკალით, მშობლებს რაღას ერჩით, თან რისთვის? აქციაზე დაჭერილებიდან უკვე მესამეს მოუკვდა მშობელი ამ რამდენიმე თვეში. გასკდა გული, აღარ დაგვრჩა ადგილი, სადაც არ დავჭრილვართ. აწი მართლა გეშინოდეთ ჩვენი. უსირცხვილო მოსამართლე კი დარბაზიდან გაძევებით გვემუქრება, თავისი ეგო რომ დაიკმაყოფილოს და მშობლების ნახვის ერთ-ერთ წყაროსაც გვიკეტავს“, – ამბობს რეზო კიკნაძე “ტვ პირველთან” სატელეფონზე საუბრისას.
შეგახსენებთ, გუშინ, პატიმარ ონისე ცხადაძეს მამა გარდაეცვალა.