დღეს “საგამოძიებო კომისია” 2011 წლის 26 მაისის მოვლენებს განიხილავს.
სხდომაზე იმყოფება მოჭადრაკე ნონა გაფრინდაშვილი, რომელმაც განაცხადა, რომ 9 აპრილს ადამიანებს გასაქცევი ჰქონდათ, 26 მაისს კი არა.
“2011 წლის 26 მაისი სპეციალურად, წინასწარ მოფიქრებული და დაგეგმილი ოპერაცია იყო. იქ ჩვენი სერიოზულად დასჯა უნდოდათ. მე ამას სასაკლაოს ვეძახი, რადგან რაც იქ მოხდა, ამას ვერავინ წარმოიდგენდა. იქამდე ბევრი აქცია ჩატარებულა – 9 აპრილიდან დაწყებული, შემდეგ რა დემონსტრაციებიც ტარდებოდა, მსგავსი არცერთ აქციაზე არ ყოფილა.
ამას იმიტომ ვიძახი, რომ ჩაკეტილი იყო. ჩვენ ირგვლივ 3 კორდონი იყო გამაგრებული და გასასვლელიც არ დატოვეს. 9 აპრილს იქ მყოფ ადამიანებს კი მისდევდნენ, მაგრამ გასაქცევი ჰქონდათ, აქ კი არა”, – თქვა გაფრინდაშვილმა.