თბილისის ვაკის მაცხოვრის ფერიცვალების სახელობის ტაძარი ავრცელებს განცხადებას, რომელშიც აღნიშნავს, რომ რუსთაველზე აქციის მონაწილეების მიერ იესო ქრისტეს გამოსახულებით კუბოს დაწვა არის საშინელი ღვთისგმობა და ნებსით თუ უნებლიეთ ეშმაკის მსახურება.
„გვინდა გამოვეხმაუროთ რუსთაველზე, აქციის მიმდინარეობისას, მომხდარ შემზარავ ფაქტს. ახალგაზრდებმა გამოიტანეს და დაწვეს კუბო, რომელზეც გამოხატული იყო უფალი ჩვენი იესო ქრისტე.
მართლმადიდებელი ეკლესია ემზადება ქრისტეშობის დღესასწაულისთვის, რაც გულისხმობს ჩვენი გულების განწმენდას, რათა მასში იშვას უფალი. მომხდარი კი არის საშინელი ღვთისგმობა და ნებსით თუ უნებლიეთ ეშმაკის მსახურება.
ასე იქცეოდნენ ეკლესიის მტრები და ღვთისმგმობლები ხატმებრძოლეობის და კომუნისტების პერიოდში, ინგრეოდა ტაძრები და წვავდნენ ხატებს. ახალგაზრდებს ვთხოვთ შეინანონ ეს გმობა და მიუხედავად დაძაბული ვითარებისა არ ჩამოშორდნენ მაცხოვარს მსგავსი მიუღებელი ქმედებებით.“ – წერია განცხადებაში.