პარლამენტთან მიმდინარე აქციაზე „რიონის ხეობის“ მცველები მივიდნენ. როგორც „რიონის ხეობის“ წევრმა, ვარლამ გოლეთიანმა განაცხადა, ისინი თბილისში ჩამოვიდნენ როგორც ეკლესიის მრევლი, იმისთვის, რომ მშვიდობიანად გააპროტესტონ მიმდინარე მოვლენები.
მისივე განმარტებით, ნებისმერი ადამიანის მიმართ მიუღებელია ძალადობა. იქნება ეს ლგბტ პირი თუ ჟურნალისტი.
გოლეთიანი ამბობს, რომ ისინი ლგბტ პროპაგანდას მხარს არ უჭერენ. თბილისში კი საპატრიარქოს მოწოდებით იმყოფებიან.
“ნებისმიერი ტიპის ძალადობა ლგბტ ადამიანების თუ ჟურნალისტების მიმართ მიუღებელია ნებისმიერი ნორმალური ადამიანისთვის და ჩვენ ამას ვემიჯნებით. “პრაიდის” იდეას როგორც არასწორ ფორმას და პროპაგანდას გარკვეული ცხოვრების წესისა, ამას ვეწინააღმდეგებით”, – განაცხადა გოლეთიანმა.
აღნიშნულს ქალთა უფლებების დამცველი ბაია პატარაია “ფეისბუქის” პირად გვერდზე ეხმაურება:
“ეს მოძრაობა ჩემთვის დღეს დამთავრდა… და საერთოდ, არც ერთ აქტივისტს არ ვაღიარებ, ვისთვისაც ადამიანის უფლებები უნივერსალური არ არის და არც ერთ ქრისტიანს არ ვაღიარებ, ვისაც თავისი მოყვასი არ უყვარს. ეს ხალხი ქრისტიანები არ არიან, რამხელა ჯვარიც არ უნდა დაიკავონ აწი ხელში. ქრისტიანობა სიყვარულია. ვისაც სიძულვილი ამოძრავებს, ის ღმერთის სახელს ამაოდ ახსენებს.” – წერს პატარაია სოციალურ ქსელში.