მიმდინარე წელს თბილისში 5 სკოლის რეაბილიტაციაა დაგეგმილი, – ამის შესახებ აღნიშნულია „ბიზნესპრესნიუსის“ კითხვის საპასუხოდ მუნიციპალური განვითარების ფონდის მიერ მოწოდებულ ინფორმაციაში.
განსახორციელებელი პროექტების ჯამური ღირებულება 44 473 061 ლარს აჭარბებს, საიდანაც 80.5%-ს ანუ 35 809 257 ლარს დონორები იხდიან. კერძოდ, დედაქალაქში დაგეგმილი 5 სკოლის რეაბილიტაციისთვის საჭირო თანხის უდიდეს ნაწილს – მსოფლიო ბანკი და ევროპის საბჭოს განვითარების ბანკი დააფინანსებენ.
უფრო კონკრეტულად, წელს თბილისში დაგეგმილია შემდეგი სკოლების რეაბილიტაცია:
- N67 საჯარო სკოლის რეკონსტრუქცია/რეაბილიტაცია და ენერგოეფექტურობის გაზრდა – 4 014 048 ლარი, საიდანაც 85.75%-ს აფინანსებს ევროპის საბჭოს განვითარების ბანკი, დანარჩენი კი ფინანსდება ბიუჯეტიდან;
- №63 საჯარო სკოლა: 14 მილიონი ლარი – 80% ფინანსდება მსოფლიო ბანკის მიერ, დარჩენილი 20% – ბიუჯეტიდან;
- №120 საჯარო სკოლა: 10 455 064 ლარი – 80% ფინანსდება მსოფლიო ბანკის მიერ, დარჩენილი 20% – ბიუჯეტიდან;
- №99 საჯარო სკოლა: 9 823 950 ლარი – 80% ფინანსდება მსოფლიო ბანკის მიერ, დარჩენილი 20% – ბიუჯეტიდან;
- №50 საჯარო სკოლა: 6.18 მილიონი ლარი – 80% ფინანსდება მსოფლიო ბანკის მიერ, დარჩენილი 20% – ბიუჯეტიდან.
აღსანიშნავია ისიც, რომ 63-ე, 120-ე, 99-ე და 50-ე სკოლების რეაბილიტაციისთვის პროექტირება მიმდინარეობს.
ცნობისთვის, დედაქალაქის გარდა მიმდინარე წელს რეგიონებში დაგეგმილია 6 სკოლის რეაბილიტაცია. კერძოდ, ეს სკოლებია: სიმონიანთხევის საჯარო სკოლა (თიანეთი), მერეთის საჯარო სკოლა (გორი), საყდრიონისა და ნარდევანის საჯარო სკოლები (წალკა), ოშორასა და ურაველის საჯარო სკოლები (ასპინძა). ამ ეტაპზე მიმდინარეობს სატენდერო დოკუმენტაციის მომზადება. ჯამში ამ 6 სკოლის რეაბილიტაცია 20.1 მილიონ ლარზე მეტი დაჯდება. აქაც თანხის უდიდეს ნაწილს დონორი – სკანდინავიური გარემოს საფინანსო კორპორაცია (NEFCO) იხდის.