ფრანგი მეცნიერები COVID-19-ით დაავადებული 17 ათასი პაციენტის სიკვდილს ერთ-ერთ მედიკამენტს უკავშირებენ.
მეცნიერები ექვს ქვეყანაში – საფრანგეთში, ბელგიაში, იტალიაში, ესპანეთში, თურქეთსა და შეერთებულ შტატებში კოვიდ-19-ის თითქმის 17 ათასი პაციენტის სიკვდილს უკავშირებენ მალარიის საწინააღმდეგო წამლის, – ჰიდროქსიქლოროქინის მიღებას.
მათი კვლევის შედეგები ჟურნალში Biomedicine & Pharmacotherapy გამოქვეყნდა.
აღნიშნულია, რომ ამ წამალს კორონავირუსით დაავადებულ პაციენტებს მისი ეფექტურობის დამადასტურებელი მტკიცებულებების გარეშე უნიშნავდნენ. მასალაში ხაზგასმულია, რომ 2021 წელს ჟურნალმა Nature-მა გამოაქვეყნა კვლევები, რომლის მიხედვითაც ჰიდროქსიქლოროქინის(იგივე პლაქველინი) გამოყენებამ 11 პროცენტით გაზარდა სიკვდილიანობა გულის რითმის დარღვევისა და სხვა გვერდითი ეფექტების გამო.
ხაზგასმულია, რომ ამ პრეპარატის შედეგად დაზარალებულთა რიცხვი შეიძლება ბევრად მეტი იყოს, რადგან მეცნიერებმა გააანალიზეს მხოლოდ 2020 წლის მარტიდან ივლისამდე პერიოდის მონაცემები.