Google Play Store-ზე კიბერუსაფრთხოების ფირმა Cyfirma-მ ორი საზიანო აპლიკაცია გამოავლინა. მათი განცხადებით, აპლიკაციებს სამიზნე მოწყობილობებიდან ადგილმდებარეობის მონაცემებისა და საკონტაქტო სიების შესაგროვებლად იყენებდნენ. Cyfirma-ში ვარაუდობენ, რომ თავდასხმა ინდოეთის ჰაკერთა ჯგუფისგან “DoNot” მოდის. თავდასხმები პაკისტანში დაფიქსირდა. ინფორმაციას უცხოური მედია ავრცელებს.
აღნიშნული აპლიკაციებია: nSure Chat და iKHfaa VPN. ეს უკანასკნელი კოდს ლეგიტიმური აპლიკაციიდან Liberty VPN იღებდა და სხვა კოდს ამატებდა, რათა კონტაქტების სიაზე წვდომა მოეპოვებინა და სამიზნის ადგილმდებარეობა გამოევლინა. აპლიკაცია სამიზნის ლოკაციის მეთვალყურეობას რეალურ დროშიც განაგრძობდა.
VPN-თა უმრავლესობა ადგილმდებარეობასა და კონტაქტებზე წვდომას არ მოითხოვს, განსხვავებით iKHfaa VPN-ისგან — Cyfirma-მ სწორედ ამიტომ გადაწყვიტა ამის გამოკვლევა.
Google Play Store-ზე ამ დროისთვის ორივე აპლიკაცია ხელმისაწვდომია. არაა გაუქმებული იმავე დეველოპერის — SecurITY Industry — მესამე აპლიკაციაც, რომელიც საზიანო არ ჩანს.
ჰაკერებს კონკრეტული სამიზნე ჰყავდათ, თუმცა ჩვენთვის ეს უსაფრთხოების გარანტიას მაინც არ იძლევა. შესაბამისად, არ აქვს მნიშვნელობა, სად ცხოვრობთ — თუკი რომელიმე მათგანი მობილურში გადმოწერილი გაქვთ, უმჯობესია, რაც შეიძლება სწრაფად წაშალოთ.
ამასთანავე, სანამ მობილურში რაიმეს გადმოწერდეთ, ჯერ კომენტარების სექციას დააკვირდით ხოლმე — შესაძლოა, სხვა მომხმარებლებს უკვე შემჩნეული ჰქონდეთ საეჭვო “სიმპტომები”.